Mizoram sawrkara Animal Husbandry & Veterinary (AH & Vety) Minister Dr K. Beichhua chuan Inrinni khan Lawngtlai District-a Mampui Vety Farm a tlawh a, Farm enkawl zui zel dan tur a enfiah.
Minister hian Mampui Vety Farm a tlawh hmain, Lawngtlaia Veterinary Hospital building sak mek chu a en hmasa a. He Vety Hospital hi National Bank for Agriculture and Rural Development (NABARD) hnuaia Rural Infrastructure Development Fund (RIDF) sum Rs nuai 85 senga sak mek niin, a sak hna hi AIE Construction, Aizawl te'n an thawk a, hna hi zaa sawmsarih (70%) vel zawh tawh a ni.
Dr K. Beichhua chuan ei leh bar leh sum leh paia ram intodelh nan AH & Vety Department chu a pawimawh hle tih sawiin, thawktute chu ram tan theih tawp chhuah turin a chah a. Sawrkar paw'n chak taka hma lain, Mizorama district pasarih -ah Veterinary Hospital sak mek a ni a, Lawngtlai Dispensary chu Hospital-ah hlan kai niin, Chawngte Rural Animal Health Centre pawh Dispensary-ah hlan kai a nih tawh thu a sawi.
Minister chuan Mampui Vety Farm ah COVID-19 hri leng vanga hun rei tak hma lak chhunzawm theih lohva a awm hnuin, vawk dahna in te chu chei that a, vawk pawh dah leh thuai tum a nih thu a sawi a. Hun reilo te ah Mampui Vety Farma vulh tur Kel dah ani ang ati bawk. Mampui Vety Farm-a thawktute chuan vawkpui kah raina hmun leh a khawl pawh a awm sa thu sawiin, a chi thlah tur vawkpa an vulh leh hunah hman chhunzawm leh nghal theih a ni ang, tih an sawi.