Lawngtlai leh Lunglei inkar kawng laihzauh hna thawh mek chu DC in a en.

    Nimin khan Lawngtlai DC, Dr. Andrew H. Vanlaldika chuan Lawngtlai leh Lunglei inkar kawng laihzauhhna thawh mek chu Thualthu bul thleng a en a, MJA Lawngtlai District ten an President hovin DC hi an tawiawm.

Kawngpui laih zauh hna thawh mek ah, Thualthu atanga Lawngtlai a 71RCC Camp thleng KM 45 chu Package 6 niin ABCI ten thawkin, an hnuai ah hian Contractor pathum leh Sub Contractor sawm an awm mek a, tun dinhmun ah hnathawhtur a ruahman 6.57% thawh zawh tawh a ni.

Cheng Vaibelchhia 546.05 senna tur Pakage 6 huamchhung a hnathawhte chu chakzawk leh tha zawk a thawk turin DC chuan Company hotute chu hrilhin, khualzin te leh bungraw phur lirthei ten harsatna an tawk thin chu tih ziaawm a nih theih nan chak zawka hmala nghal turin a hrilh a, an hmalakna chu ni hnih thum ral hnu ah enfiah a nih tur thu a hrilh a, Company hotute chuan theihtawp chhuah nghal an tum thu sawiin, fur ruahtui tla vangin harsatna an tawk fo tih sawiin, a theih hram chuan kawng chhe zuallai chu chhun khawen laiin khualzin ten paltlang thei se an duh thu DC hi an hrilh.

DC chuan fur ruahtui tla a reh chho tan a, hna hmasa ah Lawngtlai khawpui chhung chu neih tur a hrilhin, mipui ten harsatna an tawk nasa tih sawiin, Blacktop thuai turin a hrilh a, Company hotute chuan khua in a zir a nih chuan November thla hian Khawpui chhung an khawih hman an rin thu an sawi.