Ramri ah buaina a chhuak a, State chhunga kan hlauhthawn hmasak ber chu, ramri venhimnge, ei leh bar, nitin mamawh tlakchham tih chu buktham fe a tling nghal a, ngaihtuahzui peih tan ngaihtuahna a tithui khawp mai.
State a ni emaw Council a ni emaw, Intodelh tak tak tur a hmalakna hi mipui tan hian beisei chi a nilo a ngaitu an awm a nih pawn, eng sorkar pawh nise, an sukthlek thlir hian an ngaihdan tawmpui tawk an lo awm thluah a nih paw’n, dem ngawt chi an ni biklo maithei.
Boruak a sosan a piangin, kan intodelhlohzia kan hria a, Politician pakhatin, riltam chungin a huai tak tak theihloh thu a lo sawi thin te kha a dik viau a nia.
State pum huap, keinin kan thlir phalo emaw, kan thlir tul tihna kan neilo a nih pawn, Lawngtlai District hi Buh leh bal a intodelh tur a hmunhma neitha District a ni a, helam hawi a hmalakna tak tak kalpui duhtu thiltitheitu an awm a pawimawh a, Chamdur phairuam leh Chakma Area hmun zawl thate khu, Politics a inthlem lunglenna aiin, intodelhtur a hmalakna bultan nan hmang ila, ramri chu lo buai deuh pawhnise, keimahni lam kan intodelh miau chuan, mahni ramchin humtuma beihna tha pawh a chak ngei ang.