Inrinni khan a tum khat nan National Food Security Day chu District Civil Supply Office, Lawngtlai huaihawtin Lawngtlai DC Conference Hall-ah hman a ni.
He hun hi Sub-Divisional Officer (Sadar) Pu V. Lalruatliana, chuan kaihruaiin, mi harsa zawkte'n an mamawh buhfai a man tlawma an lak theihna tur leh tam laka mi rethei ber pawh an him theihna tura sawrkarin National Food Security Act (NFSA), 2013 a duan chu thil lawmawm tak a nih thu leh mipuite'n an chanvo an hriat chian theih nana Food Security Day hman pawh chu thil tha tak nia a hriat thu a sawi a. Supply Department, retailer leh mipui (consumer) te chu inpawh tlang taka thawk ho va, thil dik lo do zel turin a chah.
DCSO Pu B. Liansiama chuan District Supply Department hna thawh dan leh district dinhmun tlangpui sawiin, Lawngtlai District-ah FCI Godown pakhat leh Mizoram FCS&CA distribution centre (depot) pasarih (7) a awm a. Fair Price Shop (retailer) 107 awmin, ration card eng (AAY) 2289, card pawl (PHH) 8326 leh card var (Non-NFSA) 8637, a zavaiin ration card 19252 a awm mek a. Tunah hian ennawn mek niin, veng tinah a thlangtu (Selection Committee)-te'n NFSA beneficiary tur hi an thlang leh mek a ni.