Paithar tlangdung khua pali chawmtur tuilakna MJA ten an tlawh

        February Ni 28 zirtawpni khan Lawngtlai Dist, Paithar khaw bul a khaw pali Paithar, Rulkual, R.Vanhne leh Saikah chawm thei tur Rs 11,04,40,000 (Rs 1,104.40 lakhs) seng a siam Ni zung chakna hmanga tui lakna chu Lawngtlai District MJA te chuan an President Lalngheta Ralte ho in an tlawh.

   MJA te chuan, sorkar in ram hmasawnna tura hna a thawh hrang hrangte, mipuite’n tangkai takin, chu hmasawnna chu an hmang thei em tih chu MJA te chuan an ngaihven ber a ni a. Sorkar hmalakna hrang hrangte mipui hriat a puanzar hi chu an duh ber a nih thu an sawi a, tuna Ni zung chakna hmanga tui lakna hi sorkar in a ruahman ang taka mipuite’n tangkai taka an hman theihna turin duhsakna an hlan.

   Pu  Netralal Jaisi EE PHE Lawngtlai Division chuan, MJA te ruahmanna in site visit an neih thei chu lawmawm a tih thu a sawi a. Hmasawnna kawnga hna an thawhna ah Department leh khawtlang hruaitute thawhhona tha tak an neih avanga Ni zung chakna hmanga tui lakna puitling mai tur chu lawmawm a tih thu in.  Paithar Combine Water Supply Scheme hi a hlawhtling mai dawn a. Hemi hnu hian JJM hnuai atangin chhungkaw tinah free connection an pek tur thu a sawi bawk a ni.

    He nizung chakna hmanga kawlphetha siam chhuah nan hian Solar Module 175 awmin 55 Kw hmangin tui hi a pump chhuah theih a ni dawn a. Mi pakhat in nitin tui liter 55 zel dawng thei tura ruahman niin Kum 2049 thleng tuna an tui lakna Kurung Lui atang hian tui hi an pump thei dawn a ni. Lawngtlai District ah hian Ni zung chakna hmanga tui lakna hi Fangfar Lui ah tih puitling hmasa ber niin tuna Paithar Combine Water Supply Scheme hi a pahnihna niin Paithar, Rulkual, Saikah leh Vanhe a chhungkaw 320 te he tui pump chhuah hi an ring thei dawn a ni.

    Paithar Solar Combine Water Supply Scheme a Solar plant hi P & V Eastern Engineer, Bawngkawn Aizawl ten a hna hi thawk in, a hna dang zawng erawh chu Lawngtlai PHE Division ten thawk ve thungin Commission theih tura peih pel a ni tawh bawk.

   Pu C.Remkunga, Paithar VCP chuan sorkar hmalakna avanga Paithar khawtlang dungin tui hnianghnar tak an neih thei tur chu lawmawm a tih thu a sawi bawk a ni.

   

Paithar Combine Water Supply Scheme hi Rs 11,04,40,000 senga siam niin, NABARD Loan 90% hmang leh Mizoram Sorkar atanga 10% hmangin he hna hi thawh a ni.