Kumin Zirtirtute Ni September 5 chu Inrinni a nih vang leh naktuk hi Sorkar chawlh a nih vangin, remchan zawkna vangin vawin khan Lawngtlai District a School hrang hrang ten Zirtirtute Ni an hmang.
Teachers Day vawi 65-na hi Lawngtlai District chhunga School hrang hrangte chuan an School Buildingah leh Hall lian zawkah te hmangin, Zirtirtute chawimawi nan an thiam thilte an entir a, an Zirtirtute hnenah thilpek chi hrang hrang an hlan a. Mizoram Sawrkara Education Department changtu Minister Dr. Vanlalthlana thuchah chhiar chhuah a ni a. Lawngtlai DC leh LADC a CEM te bakah LADC Sawrkara Education changtu Executive Member te pawhin Zirtirtute pawimawhna leh fuihna thuchah leh chibai bukna an tichhuak bawk.
Pu Donny Lalruatsanga chuan Lawngtlai District- chhunga Zirtirtu zawng zawngte zahna chibai a buk a. Zirtirtute chu khawtlang leh ram hmasawnna tura lungphum pawimawh tak, zir thiamna piah lamah zirlaiten nun dan mawi, nunphung tha leh hlawhtlinna tluantling an neih theih nan a theihtawp chhuahtu; zirlaite mipuitling tak taka chhertu an nihna hi a zahawm em em a ni, a ti.
Bawrhsap chuan Zirtirtu tha tak tak zingah National leh State Teachers' Award- dawng thei an awm chu thinlung taka lawmawm a tih thu sawiin, Zirtirtu tha, National Teachers Award dawng mi pahnih leh State Teachers Award dawng mi pahnih te hnen ah chawimawina hlan an ni.
Vawiina chawimawina hlan te te chu
1.Pu H.Thanghmuna, National Teachers' Awardee
2. Pu Lalmuana, National Teachers' Awardee
3. Pu H.Hranglina, State Teachers' Awardee
4. Pu H.Zohmingthanga, State Teachers' Awardee te an ni.
Tags
News