Finance Commission hnuaia RGSA chu ADC te kaltlangin chhunzawm a ni dawn.

Sorkar laipuiin Village Council kaltlanga hmasawnna hna pawimawh hrang hrang a thawh thinna Finance Commission Grants & Rashtrya Gram Swaraj Abhyian (RGSA) chu Mizoram Sorkar in Autonomous District Council huamchhungah District Rural Development Office kaltlanga thawhtura a tih tawh chu sutin, Autonomous District Council enkawlna hnuaiah dahlet a ni.

Hemi chungchang hi vawiin khan Commissioner and  Secretary, Rural Development and Administration Department chuan tichhuakin, Finance Commission Grants & Rashtrya Gram Swaraj Abhyian (RGSA)  chu Lawngtlai District leh Siaha District ah Autonomous District Council kutah dah a nih thu a tarlang.

Finance Commission Grants & Rashtrya Gram Swaraj Abhyian (RGSA)  hi Autonomous District Council kaltlangin Village Council ten an huamchhunga hmasawnna hna pawimawh hrang hrang thawh nan an lo hmang tawh thin a, Autonomous District Council kut atanga lachhuaka RD Department enkawltura dah a ni chu an kutah dahlet turin State Sorkarah Autonomous District Council lam hian ngenna an lo thlen tawh a ni.