The Food and Agriculture Organization (FAO) of the United Nations, chuanin International Year of Women Farmer 2026 den chhena 'FAO 100 Women Heroes in Agrifood Systems and Rural Development' an thlan chhuah zingah Pi ZT. Lalrithangi (Pi Mari-i), Strawberry hlawhtling taka chingtu, Sangau, Lawngtlai District, chu telin, amah hi Mizo zingah chuan hetiang Award dawng hmasa ber tur a ni.
Pi ZT Lalrithangi'n rimtaka thawkin midangte eizawnna siamsak leh Hmeichhe tan pawn taima taka beih chuan hlawhtlin theihloh a awmlo tih a lanfiahtir chu chhuanawm tiin vawiin khan Lawngtlai Bawrhsap Pu Donny Lalruatsanga chuan Pi ZT Lalrithangi hi chawimawina thuziak leh cheng singkhat a hlan a, Bawrhsap chuan ama mimal leh DC Office Lawngtlai bakah District mipuiin Pi ZT Lalrithangi hlawhtlinna chu an chhuang hle a ti.Pi ZT Lalrithangi chuan tun dinhmunah Strawberry a chin chhan chu a la tihlawhtling kimlo tih sawiin, a tharchhuah atanga hralhchhuahtur a sawngbawl leh chu hmachhawp a a neih a ni a, a inbuatsaih mek laiin chawimawina hlutak dawng tura thlan a ni chu Pathianin a hnathawhte a hriatpui vang niin a sawi.
Chawimawina dawngtur hian India atangin mi pahnih langin, World Food Forum event, FAO Headquarter, Rome, Italy-a ah October 12-16 hian Award hi sem a ni dawn a, Pi ZT Lalrinthangi hi Ram hrang hrang 131 atanga Award dawng tlaka ngaih 600 chuang atanga mi 100 thlan chhuah zingah a tel.
Pi ZT. Lalrithangi hian strawberry chin kawngah taima takin hma a la a, a inpekna te, a phurna te, thawhrimna te leh chhuan awmzel tur tana entawntlak taka a thawh avangin, FAO-in Agriculture leh Rural Development lama hmeichhe ropui leh thawh hlawk 100 an chawimawi tur zingah a tel thei ta a ni. Amah hi Horti Fair, Mizoram 2026-a Lawngtlai Best Farmer a ni bawk.
Pi ZT Lalrithangi hian Strawberry huan hi kum 2024 khan bultanin, kumin hian bul Singkhat vel a chinga, a tharchhuah atangin Cheng Nuai 6 atanga Nuai sawm bawr vel a lalut.