Vawiin khan Dr. Lorrain Lalpekliana Chinzah, Lawngtlai East MLA chuan Pi ZT. Lalrithangi of Sangau, The Food and Agriculture Organization (FAO) of the United Nations-in International Year of Women Farmer 2026 den chhena 'FAO 100 Women Heroes in Agrifood Systems and Rural Development' an thlan chhuah zinga tel chu a personal office chamber Lawngtlai Chandmary-ah lawmpuina hun a buatsaih sak.
Lawngtlai East MLA chuan, a bial chhung nu, mi taima leh hlawhtling taka Strawberry chingtu Pi Pi ZT. Lalrithangi'n khawvel huap kuthnathawktu te chawimawina dawng tur zinga thlan chhuah a ni chu thinlung taka a lawmpui thu leh, kuthnathawktu te chawimawina ropui tak a nih thu a sawi a. Pi ZT Lalrithangi hlawhtlinna chu a mimal tak pawha chhinchhiah tlak a tih thu sawiin, a lawmpui zia lantir nan pawisa fai Rs. 10,000 /- a hlan bawk a ni.
Pi ZT Lalrithangi chuan tun dinhmunah Strawberry a chin chhan chu a la tihlawhtling kimlo tih sawiin, a tharchhuah atanga hralh chhuah tur a sawngbawl leh chu hmachhawp a a neih a ni a, a inbuatsaih mek laiin chawimawina hlu tak dawng tura thlan a ni chu Pathianin a hnathawhte a hriatpui vang niin a sawi.
Chawimawina dawng tur hian India atangin mi pahnih langin, World Food Forum event, FAO Headquarter, Rome, Italy-a ah October 12-16 hian Award hi sem a ni dawn a, Pi ZT Lalrinthangi hi Ram hrang hrang 131 atanga Award dawng tlaka ngaih 600 chuang atanga mi 100 thlan chhuah zingah a tel.
Pi ZT. Lalrithangi hian strawberry chin kawngah taima takin hma a la a, a inpekna te, a phurna te, thawhrimna te leh chhuan awm zel tur tana entawntlak taka a thawh avangin, FAO-in Agriculture leh Rural Development lama hmeichhe ropui leh thawh hlawk 100 an chawimawi tur zingah a tel thei a, hetiang chawimawina hi Mizoram aṭanga dawng hmasa ber tur niin, amah hi Horti Fair, Mizoram 2026-a Lawngtlai Best Farmer a lo ni tawh bawk a ni.