Vawiin khan LADC, CEM Confernce Hall, Lawngtlai ah Mizoram a Autonomous District Council pathum a Chief Executive Member te inhmukhawmin, Autonomous District Council pathumten hmasawnna an neihtheih nana rualkhai zawka hmalak tha an ti.
Inkawmkhawmna ah hian CEM pathum te hi Pu C.Lalsawmzuala, LADC, Pu M.Laikaw .CEM, MADC leh Pu Nirupam Chakma, CADC te bakah anmahni tawiawmtute an tel a, LADC a Chairman Pu C.Lalmuanthanga pawh he hunah hian a tel.
Vawiin a Autonomous District Council pathum hruaitute inhmukhawm chuan hmasawnna an neihtheih nan :
Sorkar laipuiah Special Development Fund dil tha an ti a, State Sorkar atangin Revised Estimate an hmuhtheihloh vangin bawhzui turin ADC pathum ten a huhovin Chief Minister leh Governor hmuh tha an ti a, Elementary School chin ah Samagra chu District Council kutah dah ni se. Hmun kilkhawr zawk amite dawmkan nana Sorkar laipui ruahmanna Vibrant Villages Programme-II (VVP II) pawh Autonomous District Council huamchhung ami chu ADC te kutah dah a nihtheih nan thuneitute ngen tha an ti bawk.
Mizoram Sorkar leh District Council ten Compensation Award atanga Administrative Cost an insem dan, State Sorkarin 70% leh District Council-in 30% an chan thin chu District Council in 80%, Mizoram Sorkar (DC) in 20% chang turin hmalak an remti a, Lai, Mara leh Chakma Autonomous District Council te'n Kut (Festival) an neihna ah Cultural troupe intirh tawn bakah Elected Office holder pakhat theuh in-palai tawn thin ni se an ti bawk.
He thutkhawm-ah hian Lai, Mara leh Chakma Autonomous District Council te chuan inpumkhatna tha zawk neia thawhho zel tha an ti a, Sorkar Laipui leh State Sorkar nena thawkhova, Sixth Schedule in thuneihna a pek hmanga hmasawnna ruhrel siam zel an tum thu an sawi bawk.
Autonomous District Council pathum ten rualkhai zawka ke an pentheih nan hmalakna ah sulsututur a hnuaia mite hi an ruat.
Chairman: Pu M. Laikaw, CEM, MADC
Vice Chairman: Pu Nirupam Chakma, CEM, CADC
Secretary: Pu Sanghuliana Mualchin, Dy. CEM, LADC