Lawngtlai District chhunga Ram zalenna Ni champha lawmna puiber chu tukin zing dar 8 khan Central YLA Playground ah Minister Pu B.Lalchhanzova hovin neih a ni.
Khuallian Pu B.Lalchhanzova chuan Hnam puanzar pawtpharhin Parade contingent 15 ten Hnam puanzar chibai an buk a chhanglet a,
Pu B.Lalchhanzova chuan Lawngtlai District mipuite Zalenna Ni champha chibai bukin duhsakna a hlan a, Lawngtlai District chhunga Sorkar hmalakna hrang sawiin, Lawngtlai District chhunga Autonomous District Council pahnih, Lai Autonomous District Council leh Chakma Autonomous District ten theihtawp chhuahin mipui tan hna an thawh thu a sawi a, LADC Taxation Department chuan kumin April atanga July inkar ah chhiah, Vehicle Entry atangin Rs. 1,39,02,406/- (Nuai 139, sang 2 zali paruk) an hmu a ti a, Faina leh thianghlimna ah te, khawpui inrelbawlna felfai zawk nan te LADC chuan hma a lamek a ti.
Supply Minister chuan DCSO, Lawngtlai chuan kumin January atanga July chhungin Buhfai Quintals 48,733 a dawng tih sawiin District chhunga Fur laia tlawhpawh harsaah te Fur chhung daih Buhfai chhekkhawl vek a ni a ti.
Information Minister Pu B.Lalchhanzova chuan I&PR Department chuan Mipuiin Sawrkar hmalakna leh ruahmannate an hriat zung zung theih nan theihtawp chhuahin puanzar hna a thawk tih sawiin, Chanchinbu leh Arts peng hrang hrang hmasawnna atan hma a la reng a, Journalist te tan hamthatna hrang hrang siam a ni a ti.
Minister hian Sorkar Department hrang hrang hmalakna langsar zual a sawi a, Bawrhsap hmalakna hnuaiah Banakaih hnuaia District Catalytic Intervention Plan atangin Lawngtlai khawpui hmasawnna atan kawng hrangin hmalakna kalpui mek a ti bawk.
Lawngtlai a Independence Day lawmna ah hian Adviser to CM, Dr.Lorrain Lalpekliana Chinzah, LADC a CHief Executive Member Pu C.Lalsawmzuala leh LADC a Executive Member te, MDC leh Sorkar mipawimawh thahnemtak an tel.
LADC a CEM in At Home buatsaihin, CEM chuan State Sorkar leh Council Sorkar in thawhhona thatak an nei chu lawmawm a tih thu a sawi.
Tags
News