Nilaini apiangin No Official Vehicle Day hman a ni dawn.

General Administration Department (GAD) Government of Mizoramin 'Economy and Fuel Conservation Measures' a tihchhuah tak bawhzawiin vawiin khan Lawngtlai Bawrhsap Pu Donny Lalruatsanga kahhruaiin DC Conference Hall - ah Heads of Department - te an thutkhawm.

Pu Donny Lalruatsanga chuan  West Asia buaina avangin khawvelin tuialhtheiah harsatna a tawk mek tih sawiin, heihian nghawng a nei lian hle , a ti. Economy and Fuel Conservation Measures - chungchanga Prime Minister - in ngenna a siam bawhzuia GAD- ten Office Memorandum - a tihchhuah chu Lawngtlai District-ah pawh a theih chin chinah kalpui a tul hle a ti a. A bik takin Tuialhthei leh Kawlphetha renchem kawngah Department hotute mawhphurhna la ngam tur leh inrenchem thar turin a chah a. Office Memorandum- in a sawi ang a Public Transport - hman tangkai thiam te, Video Conference kaltlanga Meeting neih te, tul lova District pawn lamah zin leh a dangte theih chin chinah kalpui  turin Heads of Department - te a chah.

Thutkhawmah hian GAD in Office Memorandum- a tihchhuah chu uluk taka sawiho a ni a. Kawlphetha renchem kawngah mahni Office - ah theuh bawhzui ni se, Nilaini apiangin ' No Official Vehicle Day ' kenkawh ni se,  tul leh pawimawh a awm a nih loh chuan District - pawn lamah leh State pawnah te  zinchhuah loh hram ni se an ti a. Office staff atanga zaa sawmhnih ten in lam atanga hnathawh tur tih chu mahni department remchan dan anga kalpui ni se tiin GAD Office Memorandum- chu a theih ang anga zawm ni se an ti.