Vawiin chawhnu khan Lai Autonomous District Council a Chief Executive Member Pu C.Lalsawmzuala chuan Lawngtlai Bawrhsap Pu Donny Lalruatsanga chu a Pisa ah tlawhin, Lawngtlai District leh Lawngtlai khawpui hmasawnna tur hrang hrang an sawidun.
Pu C.Lalsawmzuala CEM chuan Lawngtlai District in ataka hmangaihtu Bawrhsap an nei chu lawmawm an tiin, LADC tan pawn Bawrhsap hmalakna hrang hrangte chu a thlamuanthlakin, neitu thinlungpua Bawrhsap in Lawngtlai District a awp chu chhuanawm a tih thu hrilhin, CEM hian Bawrhsap chu Lai Coat a hlan.
Bawrhsap Pu Donny Lalruatsanga pawn CEM in a tlawh chu lawmawm a tihthu sawiin, hmasawnna hna chu tanrualna atangin a hlawhtling thin tih sawiin, LADC Sorkar in inhawng taka hmalakna hrang hrangte an phurpui thin chu lawmawm a tih thu a sawi.
CEM leh Bawrhsap hian Lawngtlai khawpuiin faina, thianghlimna leh mawina ah hmasawnna a neihtheih na turte, Lawngtlai District chhunga Khualzinte hip theitur hmun hrang hrang humhalha, cheibawl a tul thute an sawiduna, heng bakah hian State Sorkar leh LADC Sorkar tangdunin District hmasawn theih nana tihtheih an neih hrang hrangte an sawidun bawk.
CEM hi Pu C.Lawmsangzuala I&PRO, LADC leh Pu Joseph Lalhmingthanga Chinzah Deputy Registrar to Cooperative Societies, LADC ten an tawiawm.