Lawngtlai khawpui laili, Helipad bula Tawngtaina Tlang, Bethel Prayer Mount panna kawng laihzauh leh Lirthei dahna tur mumal zawka siamdantur, tukin khan Lawngtlai West MLA, Lawngtlai Vengpui bialtu MDC nibawk, Pu C.Ngunlianchunga leh Lawngtlai Bawrhsap Pu Donny Lalruatsanga ten an en.
Bethel Prayer Mount hi Thlaraumi leh fianriala Pathian pawl thin leh pawl duh ten an panber a nih bakah, Camping leh Crusade te pawh neih thinna niin, a panna kawng chu a tel vangin Lirthei insulpel theih a nilova, heibakah hian Lirthei hunna duhthusam a awmlo bawk vangin Pu C.Ngunlianchunga chuan kawng laihzauh a inhuam thu leh Lirthei dahna pawh mumal zawka siam tha a tih thunLawngtlai Bawrhsap chu hrilhin, he hna thawktura enfiah hmasak ngai, kawng zauhdan tur leh thildangte tukin khan Lawngtlai West MLA leh Lawngtlai Bawrhsap chuan an en a, Pu Donny Lalruatsanga chuan Pu C.Ngunlianchunga inhuamna chu lawmawm a tih thu sawiin, khawpui thangzel tan pawn kawng laihzau leh lirthei dahna siam chu thiltha tak a nih thu a sawi a, DC Office lamin he hna thawh a nih theih nan buaipuiturte an lo buaipui hmasak a ngaihthu leh a ranglama hmalak a nihtheih nan theihtawp an lo chhuahtur thu Lawngtlai West MLA hi a hrilh.
Kawnglaih zauh tura ruahman hi Metres 150 vel a thui niin, Light Motor Vehicle chin insulpel thei tura laih tum a ni a, Tawngtaina Tlang luhdawn Gate pawn lamah hmun zawl awmsa chu Lirthei tamzawk dah nan laih zau tum a nih bakah, kawngpui atanga Tawngtaina Tlang panna pengthuam chu luh leh chhuah nuamzawk turin mumal zawka siam tum a ni bawk.
Pu C.Ngunlianchunga chuan hmasawnna atana ruahmanna a neihte Bawrhsap in phurtaka a dawngsawng thin chu lawmawm a tih thu sawiin, DC lam an inpeih hun hunah hna tan maiturin an inpeih reng thu a sawi.