Tuihri ni a rin vangin mi pali thihbelh. Myanmar ah bungrua thawnluh khap ani.

Kumin November thla atanga Lawngtlai District chhung, a bikin Myanmar ramridep Kakichhuah leh a chhehvel a Tuihri leng chuan ziaawmlam a panhret hnu ah tunhnai ah he natna ni a rinhleh vangin mi pali an thih belh leh. Tihian hriattheih chinah Tuihri ni a rin vangin Lawngtlai District chhungah mi sawm (10) an thi tawh.

Tunhnaia mi pali thite hi Lairam Christian Medical Centre, Lawngtlai a thi niin, thi zinga pahnih chu District pawnlam an ni tih Damdawiin thuneitute chuan an sawi.

Vawiin khan Adviser to Chief Minister (Health & Family Welfare) Dr.Lorrain Lalpekliana Chinzah chuan Lairam Christian Medical Centre hi tlawhin, Tuihri ni a rin Damdawiin lamin an enkawl dante enin, damlo te a kan bawk.

Dr.Lorrain Lalpekliana Chinzah chuan tun hnaia he natna ni a rin chu finfiah turin ZMC ah sample thawn a ni a ti a, Tuihri vangin mipui chiailo tura chahin, lohtheihlohna vanga Myanmar ramri lama kalte chuan mahnia ei leh in thianghlim intum tura chahin, he natna ni a rinhlelhte chu rangtaka damdawi lam thiamte pan turin a chah a, natna hrik chu boruak a leng a nihloh vangin, inven harsa a nilo a ti.

Lairam Christian Medical Centre ah hian tun dinhmun ah Tuihri ni a rin mi pasarih enkawl mek niin,   ngaihtuahawm an awmlo niin a enkawltu Doctor chuan a sawi.

Hetianga Tuihri ni a ngaih vanga thi an awm leh vang hian Lawngtlai District Magistrate chuan khapna thupek chhuahin, Lawngtlai District leh Myanmar inrinna te chu khar a ni a, sumdawnna lam chi reng reng pawh engmah kalpui phal a nilo.

Central Young Lai Association pawhin Tuihri vang hian hriattirna chhuahin, mipui him zaawk nan Myanmar ramchhungah bungrua thawnlutlo turin sumdawngte an ngen a, Lirthei neitute pawh an ngenna ngaipawimawhturin an chah.