Bawrhsap in dan leh thupek ngaipawimawh chunga hlimtaka kumhlui thlaha, kumthar lawm turin mipui achah.

Lawngtlai Bawrhsap Pu Donny Lalruatsanga chuan Lawngtlai District mipuite, boruak nuamtak hnuaiah hlimtaka Kumthar hmuak thleng tura duhsakna hlanin, Sorkar in a khap Halpuah lam chi tellova Kumhlui thlaha, Kumthar lawm turin mipui a chah.

Lawngtlai Bawrhsap hian vawiin khan Lawngtlai a thuthar thehdarhtute kawmin, boruak nuamtak hnuaiah Krismas hman zawh a ni chu Tlawmngai pawl ten Sorkar ruahmanna hnuaiah theihtawp an chhuah vang a ni a ti a, Kumthar hmuak tura inbuatsaihna ah pawh Tlawmngaipawlte nen thawhhona thatak hnuaiah boruak nuamtak a awm ngei a beisei thu a sawi a, Pu Donny Lalruatsanga chuan Sorkarin a khap, halpuah lam chi hallo turin mipui a chah a, khapna thupek chu mipui tan anih vangin, mitin midangtan hnawksaka awmlo turin a chah.

Bawrhsap hi Lawngtlai SP, Pu PC Lalchunglura leh Excise and Narcotic O.C Pu Rengpuia ten an  tawiawm.

Lawngtlai SP chuan Krismas leh Kumthar vuakvetah Lawngtlai khawpui chhung chu bial thum ah thenin, Police leh YLA te an duty thin a ti a, dan bawhchhia mante chu dan hnuaiah hremna lekkawh a ni ang a ti a, Lawngtlai bakah Chawngte, Sangau, Bualpui Ng, Vaseikai, Bungtlang South leh Boropansury ah te pawh Police te rimtakin boruak duhawmlo thleng palh thei vengin an duty thin a ti.

Excise.O.C Pu Rengpuia chuan kumin October 13 atanga Operation Jericho kalpui a ni chuan khawpui chhungah ruihhlo a vanphah hle ni a sawiin, heihian hunpui boruak pawh a tinuama an hriat thu a sawi a, Operation Jericho neih chhungin, ruihhlo vanga thubuai ziahluh 76 a awm thu a sawi bawk.