Lai Autonomous District Council Inthlanpui neihna tur ah State Election Commission chuan kumin December 3 ah Vote thlak a nih tur thu vawiin khan puangin, Election neih turah hun leh ni paiwmawhte pawh tichhuak nghalin, Model Code of Conduct hman nghal a nih thu puan a ni bawk.
Dr.H.Lalthlangliana Commissioner, State Election Commission chuan vawiin chawhnu khan a Pisa ah thuthar thehdarhtute kawmin LADC inthlanpui neih huntur hi a puang a, vawiin
tlai khan Lawngtlai District Election Officer, Pu Donny Lalruatsanga chuan a Pisa ah Lawngtlai a thuthar thehdarhtute kawmin LADC Inthlanpui neih hun tur leh thilpawimawh dangte a hrilh.
Pu Donny Lalruatsanga chuan LADC Inthlanpui chu boruak nuam leh muanawm tak hnuaia neih a nih theih nan ruahmanna hrang hrang siam a nih tawh thu leh ruahmanna thar siam ngaite pawh bawhzui chhozel a ni a ti
Inthlanna chuhtumte tan November 14 thleng hming pekluh theih a ni dawn a, hemi Ni vek hian hming pekluhte chu endik a ni anga, inhnukdawk duhte tan November 17 thleng hun hawn a ni.
LADC Inthlanpui neihturah December 3, 2025 ah mipui ten Vote an thlak anga, Vote thlak that ngai a awm a nih chuan a tuk November 4 ah Vote thlak that a ni ang.
LADC Inthlanpui neiha vote tlate chu December 9, 2025 ah chhiar a ni anga, December 12 ah inthlanna pumpui hi zawhfel tura ruahman a ni.
