Lai Autonomous District Council ah Chief Executive Member atan BJP hruaitu M.Kawnpui bialtu MDC, Pu N.Zangura chu Governor in a ruatna vawiin khan tihchhuah a ni a, LADC ah ZPM Sorkar a din reng laia CEM dang ruat a ni chu LADC Chairman Pu T.Zakunga chuan mak a tih thu a sawi.
LADC Sorkar ah kumin February 27 khan ZPM hruaitu Pu V.Zirsanga chu CEM atan lakluh a ni a, March 17 khan Executive Member pakua lakluh an ni leh a, Sorkar dinglai chuan Emergency Session pawh April 17 atanga 22, 2025 khan paltlangin Budget pawh passed a nih hnu ah, ZPM Sorkar chu nghingin, United Democratic Alliance MNF, MDC 11 leh ZPM atanga BJP zawmtu MDC 2 bak ah pawnlam atanga thlawptu Congress MDC pakhat nen, BJP hruaitu Pu N Zangura chuan LADC ah thlawptu a ngah tawk thu leh Sorkar na siamtir turin Governor ah ngenna a thlen a, he thu kalzel ah hian Pu N Zangura chu Governor in CEM a a ruatna chu vawiin khan tihchhuah a ni a, Ni 10 chhungin thlawptu a neihdan fiah tur a tih a ni.
Hetihlai hian tun dinhmun ah LADC ah ZPM Sorkar Pu V.Zirsanga kaihhruai chu thiah a la nilo tih ZPM Sorkara LADC Chairman Pu T.Zakunga chuan The Lawngtlai Post in a biakna ah sawiin, Pu V.Zirsanga chu CEM atan pawm a nih hnuah Ni 30 chhunga thlawptu a neihdan fiahtura tih a nihlaiin, fiah a nihtheihna tura LADC Session koh nimahse, Session neih dawn ah Chairman leh Dy. Chairman an ban vangin Session hi neihtheih a nilo tih sawiin, hemi chungchang hi Governor ah pawh hriattir niin, tunah LADC ah ZPM Sorkar a dinreng laiin CEM thar ruat a ni ngawt mai chu hriatthiam harsa a tih thu Pu T.Zakunga chuan a sawi.
United Democratic Alliance lama an hruaitu pakhat chuan Chairman leh Dy.Chairman an ban hnu ah pawh Floor Test nei turin humtiam a ralloh thu leh, hmalakzuina a awmloh vangte, Governor thu anga Floor Tedt neitura hriattir nawnna pawh bawhzui a awmloh vang leh tun dinhmun ah Pu V.Zirsanga chuan thlawptu Member a neihngah tawkloh vangin LADC ah CEM pahnih awm anga sawichu mipui rilru hruaikawina a nih thu a sawi
11th LADC Term kallai ah hian kum 2020 inthlanpui ah Seat 25 ah MNF chuan Seat 20 la in, BJP leh INC ten seat khat ve ve an la a, Independent pathum thlantlin a ni a, MNF Legislature Party chuan Pu Manghmunga Chinzah kaihhruai Sorkar din in, MNF Legislature Party chhungah hruaitu thlak duhna awmin Pu V.Zirsanga'n Pu Manghmunga Chinzah chu a thlak a, Pu V.Zirsanga kaihhruai Sorkar chu United Legislature Party MNF MDC leh Congress MDC 1 in an din chuan thlak leh in Congress hruaitu Pu C.Lalmuanthanga kaihhruai Sorkar a piang ve leh a, ULP Sorkar chu kumin February thla khan Member a ngah tawkloh vangin CEM in banna thehlutin ZPM Sorkar Pu V.Zirsanga kaihhruai chuan Sorkarna an chang chhova, LADC Politics inlumlet nasatak kar ah tun dinhmun ah United Democratic Alliance hruaitu BJP Member Pu N.Zangura chu Governor in CEM atan a rawn ruat a ni.
Pu N Zangura hi CEM ah lakluh a nih chuan tuna LADC Sorkar Term kallai ah Sorkar inthlak vawi li a thlenna tur leh CEM panga lakluhna a ni anga, MNF, Congress, ZPM leh BJP kaihhruai Sorkar kum 5 chhungin a piang anga ngaihtheih a ni ang.