Tukin zing dar 6:30 khan Mizoram Governor in Lai Autonomous District Council a Chief Executive Member atan a pawm, M.Kawnpui bialtu MDC, BJP, MDC, United Democratic Alliance hruaitu, Pu N.Zangura chu LADC Hall ah, Additional DC Pu David Lalrinawma’n rinawmna thu tiamtirin a lalut.
CEM lakluhna inkhawm hi LADC a Executive Secretary Pu K.Lalthanzara’n kaihruaiin, CEM lakluhna ah hian United Democratic Alliance a tel MDC te bakah BJP hruaitute leh Official pawimawh zual te an tel.
Lai Students’ Association ten LADC Sorkar thiah an ngiatna kalzel ah CEM lakluhna ah engemaw thlengpalh thei vengin Police an duty a, nizan khan Lawngtlai District Magistrate chuan Council Veng leh New Vengpui ah punkhawm khapna a lo tichhuak tawh bawk.
CEM thar Pu N.Zangura chuan CEM atan lakluh a nih hnu ah a Office luahnghalin, Pathian hnen a lawmthu sawia inhlanna te neih a ni a, hemi hnu hian CEM thar chuan Chief Executive Member dinhmun a luahthei chu Pathian remruat a ni tih sawiin, a kaihhruai Sorkar indinchhohdan ah mithenkhat ten felhlel leh fuhlo a awm ni a ngaitu an awm tih sawiin, dan dinglai palzutna an neihloh thu leh duhthlanna an neih hmangin Sorkar an din thu a sawi a, mimal hamthatna leh duham vanga Sorkar din an nihloh thu leh a kaihhruai Sorkar chuan thuchung nilovin, kalchhuakin theihtawp chhuahin hna a thawh tur thu a sawi.
Chief Executive Member thar chuan Lairam mipui ten hmasawnna an neihtheih nan a kaihhruai Sorkar chuan theihtawp a chhuah tur thu a sawi.
Tun 11th LADC Term kallai ah tukin lakluhtak BJP hruaitu Pu N.Zangura hi CEM pangana niin, LADC ah hian MNF, Congress, ZPM leh BJP kaihhruai Sorkar a piang tawh.
LADC ah hian tundinhmun ah BJP MDC pahnih , MNF, MDC 11 leh pawnlam atanga thlawptu Congress MDC pakhat nen BJP kaihhruai United Democratic Alliance hian Elected Member 25 ah Member 14 an nei mek a, ZPM chuan Member 11 an nei mek.