Mizoram Health Systems Strengthening Project (MHSSP) hmalakna hnuaiah nimin zing dar 7:30 khan Lawngtlaiah hriselna atana kea kal runpui, "Walk for Health Walkathon 2025" neih a ni.
Kawng zawhtute hi hmun thumah inthenin team khat na hi Chawngte Peng, Chandmary Square, atanga kal tanin, team hnih na hi AOC Petrol Pump atanga kalin, team thum na hian H.Tawklinga Point, New Vengpui atangin bul an tan thung a. DC Office kawt tualzawlah intawkkhawmin hetah hian inkhawm tawi buatsaih a ni a. Kharna inkhawmah hian Pi PC. Lalramsangi, DPC,NP-NCD, chuan Non- Communicable Diseases chungchang zirtirna hun hmangin, Zaithiam zai ngaihthlak a ni a. Ke a kal tam tura intiamkamna nei a au rualna neih niin, ANM School, Lawngtlai, chuan Street Play hmuhnawm tak entirna an nei bawk.
Walk for Health Walkathon 2025- ah hian Lawngtlai khawpui chhung mipui, School naupang, YLA, LWA, MHIP, MJA, Health Department leh Lawngtlai khawpui chhunga sawrkar department hrang hranga thawktute an tel thei a. Dr. C. Lalzampuii, Medical Officer, MMU, chuan lawmthu sawina neiin hun a khar.