Vawiin khan Lawngtlai District tana Pradhan Mantri Dahrti Aaba Janjatiya Gram Utkarsh Abhiyan (PM DAJ-GUA) Campaign kal zelah Pu Zoramsiama Hmar, Addl.DC, Lawngtlai kaihhruaina hnuaiah DC Office, Lawngtlai tualzawlah 'Health Camp & Free Clinic' Dr.Lorrain Lalpeklian Chinzah, Adviser to Chief Minister chuan a hawng
Dr.Lorrain Lalpeklian Chinzah, Adviser to Chief Minister chuan 'Health Camp & Free Clinic' hawnnaah hian thu sawiin, Lawngtlaia PM DAJ-GUA kalpui turin khua-73 thlanchhuah a nih thu tarlangin, he scheme hnuaia za a za hlawhtlinna hmu turin line department hrang hrangte an pawimawh tiin theihtawp chhuah turin a chah a. Lawngtlai District chu zirna lamah a hnufual hle tih tarlangin, Zirna siam tha turin 'Grass root Elimentary Education' atanga siam that a ngai a ni, a ti. Adviser to Chief Minister chuan hriselna kawnga hmasawn turin faina leh thianghlimna lama tan la thar turin a sawm a. PM DAJ-GUA- hnuaia hmasawnna kalpui tur hrang hrang zingah kawngpui leh a kaihhnawih siamthat, buh leh thlai thar lama hmasawnna te, zirna tha a awm theihna tura hmalaknate bakah hriselna kawnga hmasawnna tur hrang hrangte chu ngaihpawimawh zual a nih tur thu a tarlang bawk. PM DAJ-GUA kaltlanga Lawngtlai district mipuiten hamthatna an hmuh bakah chhungkua leh khawtlangah hmasawnna a thlen theih nana hmang tangkai turin duhsakna a hlan nghal bawk.
Pu Cheemala Siva Gopal Reddy, Deputy Commissioner, Lawngtlai chuan India sawrkarin Tribal- te dinhmun leh mamawh hriain hmasawnna kawng hrang hrangin a kalpui thin a, Mizoramah pawh Tribal an tam avangin he scheme tha taka kalpui a nih chuan ram leh hnamin nasa takin hmasawnna a hmu thei dawn a ni, a ti.
He hunah hian Dr. Lorrain Lalpekliana Chinzah chuan mi pahnih hnena Adhaar card a hlan a, Pu Cheemala Siva Gopal Reddy, chuan mi pakhat hnenah a hlan bawk.