Yuva Utsav hi Central YLA Hall, Lawngtlai-III ah neih niin, he hun hmanpuitu Lai Autonomous District Council a Chief Executive Member, Pu C.Lalmuanthanga chuan India in zalenna a neih kum 75na lawmna kalmek ah Thalaite puala kutpui buatsaih a ni chuan Thalaite ram tana inpekna leh hmathlir dik neiturin a kaihharh ngei a beisei thu a sawi a, kum 2047 ah chuan India chu ram hmasawn changkang tak niturin hmalakna kalpui mek a nihrualin, tualchhunga Thalai zingah nunthlahdah, hnathawk peihlo, ruihhlo bawia tang tamtak an awm chu veitham a tling tih CEM chuan sawiin, Thalaite chu ram lungphum leh ram leh hnam hmalam hun innghahna a nih vangin Thalaiten tihtakzetna nen ram tan hmalam an pan a, hmathlir leh ngaihhlut tur dik an thlan thiam a tul a ni a ti.
Thalaite Kutpuia thusawitu dang, Project Director, DRDO, Lawngtlai Pu H.Zonunmawia chuan Zirna lam ah rualawh a na tih sawiin, Lawngtlai District atangin Competitive Exam ah tling an tlem thin chu veitham a ni a ti a, zirlai ten midang elpui an nei tih an hriat rualin, mahni ngei pawh intlansiak nachang an hriata, hmalam pantura an beih fat fat tul a tih thu a sawi.
Youth Festival Lawngtlai a hmanna ah hian Sorkar Department leh mimal leh Zirna In atang ten an thilsiam leh hmalakna te pholan niin, Yuva Utsav pualin intihsiakna hrang hrang buatsaih a ni bawk.
Tags
News