Rampum a Faina beihpui thlak Swachhata Hi Seva kalpui mekah vawiin khan Lai Autonomous District Council chuan faina hnatlang pui kovin, LADC hnuaia thawkte an chhuak tha hle.
Faina hnatlang hi LADC hmunpui Lawngtlai bak ah Lai House, Aizawl leh Sangau, Bualpui 'NG', Vathuampui leh Bungtlang South a LADC Office ah te pawh neih a ni.
Lawngtlai a LADC Office pui a hnatlang hi Chief Executive Member Pu C.Lalmuanthanga chuan telpuiin, CEM chuan faina chu ngaiah neih tul a tih thu a sawi a, hnam changkang apiangin faina an ngaipawimawh tih sawiin, LADC Office te chu mi chi hrang hrang fuankhawmna a nih vangin Office dawr tute pawn faina an ngaihpawimawh a tul a ni a ti a, Sorkar laipuiin faina beihpui thlak a kalpui mek chu LADC chuan tha a tiin, a tihlawhtlingtu niturin theihtawpin hma an lakzui tur thu a sawi.
Vawiin hnatlangah hian Office chhung leh a chhehvel te thawktuten an thianfai a, an bawlhhlawh te chu Sanitation Department in motor hmangin a paihna hmun ah an paih nghal a, LADC hnuaia Sanitation Department chuan tuktinin Lawngtlai khawpui chhung veng hrang hranga bawlhhlawh motor hmanga an paih thin bakah khawpui lunlai leh Office pawimawh zual awmna chhehvel te chu an phiatfai reng tih Sanitation Officer Pu C.Lalhmunsiama chuan a sawi.
LADC a Executive Secretary Pu K.Lalthanzara chuan LADC hnuaia thawkten faina hnatlang an nei chu thawktuten faina lama hmalak a pawimawhzia inzir thar nan hmang se a duh thu sawiin, Sorkar laipui hmalakna tihhlawhtlinna piahlam ah, faina lama midang zirtirna hmanrua pawimawh tak a ni a ti.
Tags
News