Vawiin hi International Literacy Day a ni a, Mampui ah LADC a Executive Member, Middle School enkawltu Pu Pu Andrew Laltlanzara hovin Gov't Middle School Mampui-ah hman ani.
Pu Andrew Laltlanzara E.M. chuan International Literacy Day chu khawvel pumpuia hman a ni thina, khawvel hian a ngai pawimawh hle a ti a, kum 2011 chhiarpui ah Lawngtlai District ah mihring 1,17,894 awmin, Covid-19 avangin Census neih chhunzawm theih a ni lo a, mithiamte chhût danin, tluang takin Census neih theih chu nise, Lawngtlai District chhungah hian mi 1,98,800 bawr vel mihring kan awm rin a ni a ti.
Pu Andrew Laltlanzara chuan Mizoram in India ram pumah ziak leh chhiar thiam tam tehna ah pathumna dinhmun a hauh mek laiin, Mizoram chhunga District 11 ah Lawngtlai District chu ahniam ber niin, ziak leh chhiar thiam 65.88% niin, kawng hrang hrangah tanlak a ngai nasa hle a ni a ti.
Sorkar in theih tawp a chhuah a lai hian, kan thlen chin atang hian hmasawn kan la ngai tih kan hriat a, kan veng, khawtlang, Kohhran leh chhûngkaw tin te'n hmasâwnna inkhairual taka kan neih theih nân, ziak leh chhiar thiamlote tan kan theihna zawnah theuh ke i pen zel ang u, a ti a, Sap Missionary te'n A, AW, B min siam saka, kan Pi leh Pute kha ziak leh chhiar an lo zirtira, Pathian malsâwmna changin, chanchintha avangin Zofate chuan hmasâwnna ropui tak kan lo changta a ni tih hria ila, Missionary rilru puin ziak leh chhiar thiam lo, thiam chak em em si, kan u leh naute hi zirtir thiam ila, a kaihruaitu nih intum theuh ang u, a ti.
He hun hi, Pu C. Sangthanzuala, DCAEO, LADC chuan kaihruaiin, hunserh, Rev. Ngurliantluanga Chinzah in a hmanga, Pu Ramhnehzauva, Asst. Professor, Gov't Lawngtlai College pawhin thu a sawia, Pu F. Lalhmachhuana EEO (M/S) chuan lawmthu sawiin hun a khar.