.jpg)
Social Media tangkaizia hi a hretu vek kan ni a, Political Party pawn a tangkaizia hriain hmanrua an hmanrim leh tangkai ber a ni hial awm e.
Politician te Social Media a an sukthlek hi nguntaka thlir chuan a beidawnthlak riauna lai hi hmuhhmaih theih a ni awm love. Social Media chu ramveituten thiltha inkawhhmuhna lam aiin, mahni awmna Political Party fakmawina leh midang sawiselna hmun luntak a ni deuh maiin a hriat a, Politics Group lam ngat phei chu ram tana thiltha pawchhuak zawnga thu han khel deuh laih laih aiin, tute Party emaw thuchhuah leh an hruaitute thusawi fakmawina leh sawiselna leh intihelna hmun a ni ber a, hetianga tawngpawng inhnial nuai nuai ringawtna atang hi chuan ram ropui thlen a la harsa deuh awm mange tih chu nguntaka thilrtu te rilru a nih a rinawm.
Social Media hi ram hmasawnna leh kalphung a tha zawnga kawihher nan te, thiltitheitute fuihphurnan leh thurawn pek nan te a tangkai takzet, helam erawh kan la hlat deuh in a lang lawisi lai hi a veitu tan chuan a hahdamthlak lohva, nileng leh zankhawtairek thlenga tute emaw innekna leh inpuhtawnna ringawt a hman a nih fo chuan Politician te sukthlek leh khawhawi la zimzia lanfiahtirtu langsar tak a ni ngei ang.
Social Media hi ram siam nan tangkai zawka hman hi zir ila, ram hruaitute pawn Social Media sukthlek hi an chik a, mipui aw an ngaihthlak peih a pawimawhna lian tulh tulh in a rinawm.