He hunah hian Pu Laltlawmlova Chinzah chuan thu sawiin, ”Hetiang ang tournament buatsaihna chang Pu C.Rammawia faten an hria hi lawmawm ka ti a. A ṭhat lai chuan Pu Rammawia hi mi tlawmngai tak a ni a, tlawmngaihna kawngah a entawn tlak a ni. Vawiina he tournament chhim tura lo kalte hi mipa hlir kan ni a. Infiamna ah hian discipline hrang hrang a awm a, eng sports ah pawh ni sela, hlawhtlinna chang tur chuan insum theihna te, taihmakna te leh tumruhna kan neih ngei ngei a ngai a. Kawng hrang hranga hlawhtlinna chang tur chuan Nu leh Pa zahna leh thu awina a tel loh chuan Pathian malsawmna a dawn theih loh a ni. Thuhriltu a kan hmuh angin Bible hian Ṭhalaite hi kan ṭhat lai chen a phal a, ni mahsela Nu leh Pa, chhungkua leh khawtlang tana hnawk sak leh mite thinhrik ni lo tura kan nun kan ukuk a ngai a. Nu leh Pate kan chawimawi ve theihna chu an thu awi leh zawm hi a ni. Soprts a mi hlawhtling ni tur chuan ruih theih thil chi hrang hrangah kan fihlim a ngai a, arm wrestling champion nu leh pa vau khur khur chung, chhungkua leh khawtlang tana hnawk sak nih i tum lo ang u.”
Pu Laltlawmlova Chinzah chuan a sawi zelna ah; ”Mipa chuan kan thinlung chhungrila thu tiamkam kan neih tlat tur chu; Ka nupui leh fate ka chawm zo tur a ni, ruih theih thil hian min ti buai ve tur a ni lo, chhungkua leh khawtlang tana mi hnawksak ka ni tur a ni lo a ni tiin vawiinah lo kalte pawh hian kan thinlungah thu tiam i nei tlat ang u. Hnathaw munal nei loa ṭhalai vakrawlai kan tam hi a pawi a. Kan tlangval ten kan tih ve thiam tur tih tum loa, silchar vai mistiri hnuaia helper hna kan thawk reng bik hi kan inngaihtuah chian a ngai a. Heng han te hi kan thiam ve theih a ni tih hriain bul i ṭan thar ang u. Thawhhreh hi nei lo ila, chhungkaw tan mi ṭangkai nih tum ila. A tawp bera ka sawi duh chu Nupui fanu innghahna tlak mipa, chhungkua leh khawtlang innghahna tlak mipa ni turin ka chah duh che u a, chu rilru pu reng chunga he tournament hi hlim takin hmang turin ka duhsakna ka hlan a che u” tiin he tournament hi a hawng a ni.