CENTRAL YLA THUCHHUAH
Tunhnaiah Mizoram atanga Myanmar rama dan lo anga sumdawnna - Oil (Petrol & Diesel) leh bungraw phurh luh avangin ramchhung ami te'n harsatna tam tak kan tawk a. Tin, heng bungraw phurh luhte hi Myanmar ramchhunga kan unaute ti duhdahtu leh rikraptute tha tih chakna a nih bawk avangin Central YLA chuan hun engemawchen atangin a dodal a. Lawngtlai District kaltlanga Myanmar rama bungraw phurh tur hrang hrangte endikin a dang thin a ni. Amaherawhchu, tunhnaiah Siaha District chhunga Petrol Pump neitu ni a inchhal te'n Central YLA dem zawnga thuchhuah - Siaha District chhunga lut tur Oil phur zawng zawng luhtir phal lo leh Siaha mipuite hrek zawnga thuchhuah an neih avangin Central YLA chuan hemi chungchanga thudik leh thil awmzia mipuite hnena hriattir țul in a hria a. Heng hi mipuite'n min hriatsak turin kan ngen a ni.
1) Myanmar rama dan lova Oil phurh luh avangin Mizoram chhungah harsatna tam tak kan tawk tawh a. District hrang hranga thuneitute pawhin hemi chungchanga thuchhuah (Myanmar rama phurh luh tur dan lova pekchhuah/hralhchhuah khap a nih thu) an nei nual tawh bawk a. Lawngtlai District bika thuneitute nen pawh meeting hi neih niin a bawhzui kawngah Central YLA chuan Sawrkar a thawhpui mek a, a theih ang anga thawhpui zel pawh a tum bawk a ni.
2) Siaha District tana Oil phur Tanker te hi dang lovin an vaia kaltlangtir vek an ni thin a.Amaherawhchu tunhnaiah Siaha District chhunga Filling Station neitute hminga Tanker rawn kal, mahse Siaha khawpui chhungah pawh luhtir lova Myanmar lama dan lova kaltir nghal an awm ta fo a. Oil Tanker Siaha District a lut si, mipui chan ve phak loha Filling Station kawngbo a, Pump awm lohna Myanmar ramri hnaih a phurh a ni fo hi Central YLA chuan ngun taka a ngaihtuah hnuah Sawrkar thuchhuak ngaihpawimawh lohna leh ram mipuite hrekna leh zah lohna lian tak, mipuite chanai pawh mimal hamthatna atana lak duhna thinlung tha lo tak niin a hria, pawi kan ti takzet a ni.
3) Tunhnaia Myanmar rama bungraw phurh luh avanga hlawkna tel tam tak an awm hi kan ram sum leh pai dinhmun atanga thlir chuan thil lawmawm tâk a nih rualin mipui nawlpuiin kan tawrh phahna (Oil lak tur awm mumal lo etc.) a tam avangin leh, sum leh paia hlawkna kan duh lutuk avanga ram mipuite thawhhona leh inlungrualna ti nghing khawpa kan awm hi thil tha lo tâk niin Central YLA chuan a ngai bawk a ni.
Hengte avang hian Central YLA chuan a theih chin chinah hma a la zel dawn a. Kan ram mipuite (a bikin Lawngtlai leh Siaha District mipuite) harsatna siam zawnga awmte dodal kawngah leh Sawrkar tha tichak tura tha thawh kawngah theihtawp chhuah zel a tum a ni. Chutihlaiin kan unau Siaha District mipuite'n an mamawh, a bikin Oil avanga harsatna an tawh hi Central YLA chuan a phal lova, hnianghnar taka District mipuite'n Oil an neih theihna tura Pump neitute chet låk dan dik lo (Mipuite chanai Myanmar lam a Tanker chawpa kaltir thin leh mipuite chan tur awm lova Black a zawrh thin) erawh a thlir zui zel dawn a, a theih chin chinah hma a lazel ang.
Tin, hemi chungchang hi District pahnihte inunauna chhe thei thil a nih bawk avangin hetianga dan dik lo taka chet la, District mipuite hmakhua ngai miah lova mipuite chanai pawh dan lova hmundanga hralh duh mi te thunun leh khuahkhirh kawngah khauh zawka hma la turin Sawrkar hi kan beiseiin kan ngen bawk a ni. Tin, District pahnih (2)-a mipuite pawhin kan chanai tur dik lo taka ti raltute dodal kawngah leh kawng dik kawhhmuh kawngah min thawhpui zel turin kan såwm bawk a che u.
ISSUED BY CENTRAL YOUNG LAI ASSOCIATION