June 27, 2024 a Lawngtlai Chandmary MDC biala by election neihah vote tlate chu vawiin khan chhiar a ni a, MNF Candidate Pu C.Lalsawmzuala thlantlin a ni.
MNF Candidate Pu C.Lalsawmzuala hian Vote 1161 hmuin ZPM Candidate Pu F.Hrangtukhuma'n Vote 876 a hmu a, BJP Candidate Pu K.Lalawmpuia'n Vote 19 a hmu a, MNF Candidate chuan a mah hnaihtu zawk ZPM Candidate aiin Vote 285 in a hmutam a, NOTA ah Vote 5 a tla bawk.
Thlantlin a nih hnuah Pu C.Lalsawmzuala chuan MDC atan thlantlin a ni chu Pathian awmpuina vang liau liau a nih thu sawiin, Chandmary bial mipui chungah lawmthu a sawi a, MNF leh Congress tanrualna rah a ni tih sawiin, a tlintheih nan a beitu zawng zawng chungah lawmthu a sawi.
MNF District Hqrs President Pu Lalzahawma Chinzah chuan The Lawngtlai Post zawhna chhangin LADC ah MNF in Party malin Sorkarna siamthei mahse, Congress nen a thawhdunna thuthlung an siam tawh chu MNF chuan thataka an vawnhimtur thu leh an mahniin Sorkarna siamthei mahse, LADC a Sorkarna kallai chu a buailoh tur thu a sawi.
Lai Autonomous District Council a Chief Executive Member Pu C.Lalmuanthanga pawn Congress leh MNF thawhdunna chuan rahtha a chhuah tih sawiin Chandmary bial ah MNF Candidate thlantlin a ni chu lawmawm a tihthu sawiin, Chandmary bial mipui leh an Candidate intawm thlantlin a nihtheih nan a theihtawp chhuahtute chungah lawmthu a sawi.
Hetihian tun dinhmunah LADC ah Elected Member 25 ah MNF chuan MDC 13 neiin, ZPM in MDC 10, Congress leh BJP in MDC 1 ve ve an nei a, Congress Member kaihhruaina hnuaiah Congress leh MNF thawkdunin Sorkarna an siammek.