CEM, LADC in Chamdur 'P'-I a Raltlante eitur Buhfai Quintals 10 a pe, Raltlante thlamuang taka awmturin a chah.

Chamdur 'P'-I a Bawm Raltlante tanpui nan Pu C.Lalmuanthanga Chief Executive Member, Lai Autonomous District Council chuan Buhfai Quintals 10 a pe a, CEM thilpek hi nizan khan Chamdur 'P'-I, Lawngtlai District ah phurhtlen niin, an mamawhdan enchungin khawtlang hruaitute ruahmanna hnuaiah sem a ni.

LADC a CEM chuan Chamdur 'P'-I a Raltlan ten eitur lamah harsatna an tawh thu a dawng tih sawiin, a theih ang angin tanpuidan tur kawng dap nghalin buaipui nghal a nih thu The Lawngtlai Post a hrilh a, Pu C.Lalmuanthanga chuan an sahimna zawnga LADC huamchhunga lutte chu thlamuangtakin awmse an duh thu sawiin, ei leh bar leh an taksa himna thlengin an mahni beltute chu an thlahthlam dawnloh thu a sawi a, LADC huamchhung hmun hrang hranga raltlan awmte pawh khua leh tuite zawmtur inkaihhruaina thataka zawmtur a chahin, an mahni chhawmdawl a ngaihsaktu khawtlang hruaitu, Kohhran leh Tlawmngai pawlte chungah lawmthu a sawi.

Khawtlang hruaitute hnen atanga thu kan dawn danin tun dinhmun ah Chamdur 'P'-I ah hian Bangladesh atanga an sahimna zawnga lut chhungkua 79, mihring 290 an awmmek a, Community Hall leh hmun remchang dangah te awmtir niin, karleh lam hian Chamdur 'P'-I khawtlang chuan a theih ang angin Refugee camp tur sak tumin ruahmanna an siammek.