World Bank sum hmanga District Hospital Lawngtlai chei leh siamthatna tur chungchangah vawiin khan CMO Conference Hall, Lawngtlai ah Stakeholder Engagement Consultation on Repair and Renovation of District Hospital Lawngtlai neih a ni.
He hun hi Dr.Lalhnunpuia Chhangte, Social Consultant, PMU, Mizoram Health System Strengthening Project chuan kaihruaiin, Lawngtlai District Hospital siamthat leh cheithat dantura ruahmanna awmte sawilan niin, Er.Malsawmdawngliani Sr.Executive Engineer, Health & Family Welfare Department chuan he hna kalpui dan tur tlangpui sawiin, he hnathawktur hian M/S MW Venture, Chhinga Veng Aizawl chu thlan niin, Pu Lalramsanga Senior Civil Engineer chuan hnathawhtur ruahman hrang hrang sawiin, report a a landan chuan Hospital Building chung atanga tuiput tihreh te, Mitthi dahna In sakte, OPD chhuat siamthat te, Inthiarna leh thli luanna siamthat te, Hospital pumpui rawng hnawih leh CCTV vuah te chu a langsar zual niin, hnadang thawhtur thahnem tak a awm bawk.
Lawngtlai District Hospital cheithat nan hian Rs. 1,98,21,685/- ruahman niin hna hi thla 12 chhunga zawh hman tura tih a ni.
He huna tel Tlawmngaipawl aiawh, khawtlang hruaitute leh Chanchinbumite chuan Lawngtlai District Hospital thuamthat a ni tur chu lawmawm an tihthu sawiin, a nihdan tur ang taka hna thawkturin Contractor an beisei tih an sawi a, tanpui theihna zawn an neih ah zautaka an inhawn thu an sawi.
Dr.Beiparysa K District Medical Superintendent pawhin thusawiin District Hospital Lawngtlai chu khum 50 awmna a nih thu leh thawktu indaihlohna karah theihtawp chhuaha hna an thawh thin thu a sawi.
He hun hi Sr.CMO, Dr.David Zothansanga pawn hmanpuiin, hnathawktuten hna thataka an thawh theihnan Health Department a thawkte chuan ngun taka an viltur thu sawiin Health Department hmalakna hrang hrangah khawtlang thahwpuina thatak an dawn thin vangin lawmthu a sawi.
Tags
News