Pu K.Vena chuan State Sorkar chuan a hmangtangkai duh a nih phawt chuan MP a thlantlin a nih chuan kan ram tan theihtawp a chhuah tur thu a sawi a, Rajya Sabha MP atan MNF atanga thlantlin a nih vangin Lok Sabha inthlanpuiah MNF Party behchhana Candidate anih a ngaihthu sawiin, Party behchhan nei mahse, Mipui Candidate a nih thu a sawi bawk.
Pu K.Vena chuan Lok Sabha MP atan thlantlin a nih chuan India rama hnam tenau zawk te, Sakhaw tlem zawkte nekchep an nihna atanga an hma a dingtur a ni tih sawiin, Zofate rorelna pakhat hnuaia an awmtheih nan a hmalak chu Politics a luhchilh chhan leh a tum lianber a nih reng thu a sawi bawk.
MNF, MP Candidate chuan thlantlin a nih chuan Lok Sabha MP zawk chu a thlan tur a nih thu sawiin, State a Sorkar lai chuan a hmunruak Rajya Sabha MP hnawhkhatturin MP an nei thuai dawn tih sawiin, ZPM Sorkar tan MP neihloh hlauhthawnna tur a awmlo a ti.
Pu K.Vena chuan ramdang nena insumdawn tawnna chu a ngaipawimawh hle tih sawiin, Lawngtlai District chhunga Saisihchhuah leh Zorinpui chu a taka hman tangkai a nihtheih nan theihtawp chhuah a tum thu a sawi bawk.
MNF, MP Candidate hi MNF Sr.Vice President Dr.R.Lalthangliana, MLA lo ni tawh Pu H.Biakzaua leh Dr.K.Pachhunga te bakah MNF District Hqrs. Lawngtlai hruaituten an tawiawm.