Nizan khan 22nd MFA Cup 2024 khelh tur khuhhawnna (kick off) hun chu a dawltu Lawngtlai District Football Association (LDFA) leh Lawngtlai District Election Office ṭang dun huaihawtin Lawngtlaia CYLA Hall-ah hman a ni a. Lawngtlai Bawrhsap leh District Election Officer Pu Cheemala Siva Gopal Reddy chuan Khuallian niin hun a hmanpui a ni.
Lawngtlai Bawrhsap Pu Cheemala Siva Gopal Reddy chuan Mizoram district hrang hrang ai awh infiam mi fuan khawmte chu Lawngtlai District-ah lo lawmin, Lawngtlaia an cham chhungin hlim tak leh nuam taka hun hmang turin duhsakna a hlan a. MFA Cup 2024 khelte aṭangin khawvel pum huapa lar leh hawhtling pha awm se MFA Cup hlawhtlinna leh MFA leh District FA hruaitute duhthusam ber a ni ang tih sawiin, player-te chu ṭang tak leh mawi tak sia intihsiakna hmachhawn tur te, thawhrimna leh mahni inthunun theihna nena hmasawn zel tuma bei tur te'n a chah a. Player kal khawmte lamah football chhuihin MFA Cup 2024 hi a hawng nghal a ni.
22nd MFA Cup 2024 kick off hun hi Organising Committee Working Chairman, CYLA President Pu HC Vanlalruatpuia'n a kaihruai a. Central LIKBKṬP Chairman Rev. K. Lalchamliana Lai chuan hunserh hmangin, CYLA Golden Jubilee Choir te'n hun hawn nan, "Ro Min Relsak Ang Che" tih hla an sa a. LDFA President Pu C. Hrangṭhianga'n inlawmna thu sawiin, LDFA Honorary Secretary Pu Edwin Lalhuliana Hlichhal chuan report a pe a. Kal khawmte'n MP (Lok Sabha) Inthlanpui 2024 lo awm tura vote thlak ngei tura intiamna thu an chham rual a. MFA ai awhin Honorary Vice President Er HC Lalnunzira'n thu sawiin, district tin ai awh club hrang hrangte jersey pho chhuahna hun hman a ni a. Assistant Match Commissioner Pu A. Vanlaltholeha kaihhruaiin player-te'n dan hnuaia mawi taka inkhel turin thu an tiam bawk.
MFA Cup 2024 hi Lawngtlai DFA chuan thlengin, April ni 3 - 13, 2024 chhung hian CYLA Playground-ah leh YLA Lawngtlai Vengpui Field-ah te khelh a ni dawn a. District tin aṭangin district champion club pakhat ṭheuh telin, club 11-in an khel dawn a ni.
Lawngtlaia MFA Cup 2024 khelh hi Lawngtlai District Election Office chuan Systematic Voters' Education and Electoral Participation (SVEEP) hnuaia vote thlak pawimawhna inzirtirna leh inthlannaa vote thlak tura infuihna hun remchang atan an hmang a. Kick off huna vote thlak tura intiamna buatsaih a nih bakah, CYLA Playground-ah kum 2024 MP (Lok Sabha) Inthlanpuia vote thlak tura intiam theite tan hming ziahna (signature campaign) buatsaih a ni a, vote thlak tura insawmna thuziak (banner) tar a ni bawk.