Lai Autonomous District Council a Chief Executive Member Pu V Zirsanga kaihhruai, MNF Sorkar chu a nghing mek a, CEM nilai Pu V.Zirsanga chuan a tul chuan a dinhmun kiansan a hrehlo tih a sawi.
Vawiin khan Lawngtlaia thuthar thehdarhtuten CEM Pu V.Zirsanga hi a chamber ah hmuin thilawmdan an zawt a, Pu V.Zirsanga chuan MNF Legislature Party a member thenkhat leh MDC dangte intiamrualin CEM atanga bangturin an nawr tih a sawi a, CEM chuan tunthla February 9 khan Legislature Party Leader atanga banna Dy Leader hnenah a thehlut tih sawiin, MNF Legislature Party chuan a banna chu an hnawl a, CEM dinhmun pawh chelhzui a ni tih a sawi a,Leader atan an pawmlo a nih chuan CEM hi nizui thei a nilo tih a sawi bawk.
Pu V.Zirsanga chuan Lai Autonomous District Council ah MNF kaihhruai Sorkar thatak awmzui zel theih nan tuna MNF, MDC te hi inlamletin rawn kir sela, CEM thlak an duh a nih pawh in englaipawhin a dinhmun atanga inhnuhhniama, eng chanvo mah chelh loh pawh a hrehlo tih a sawi.
Eiruk thubuai vanga Special Judge Anti Coruption Act in thiamloh a chantir LADC a CEM hian a chunga Court thuremna chu lungawilovin High Court ah a zualko va, High court chuan Court thuremna awmsa chu kalpui chhunzawmlo tura a tih lai niin, hetiang boruak kar ah hian Elected MDC 25 awmna LADC a MDC 13 te chuan Governor hnen ah Pu V.Zirsanga chuan thlawptu Member a nei ngah tawklo tih hrilhin, Sorkar thar a pian theih nan hma la turin an ngen a, heng MDC zingah hian BJP leh INC, MDC pakhat ve ve pawh an tel.
Tags
News