Editorial || RAMRI HUNG TUMNA AWM HI.

Sorkar laipui chuan Myanmar ramri hung tumin hma a la chho mek a, Mizoram Sorkar chuan ramri hung hi tha a tilo thung a, mipui ngaihdan pawh a thenphawkin a rinawm.

Bangladesh ramri hung a ni tawh a, khulama kan unaute nen min thenhran phah viau em tih chu hriatthiam a har a, Myanmar ramri hung nitase, kan inlaichinna leh unaute hi daidanna bang phenah hian a tlakhniam phah chuan, keimahni lam zirloh a nihna lai a tamin a rinawm.

Sorkarin engtianginnge a ruahman dawn hriat nilo mahse, Bangladesh lam ramrihung tawh ah khu chuan a tul huna inkalpawhna tur mumal takin Gate siam a ni ferfur a, Sipai an Duty mai a, hetiang ang tho hi Myanmar ramri hungah pawh kalpui dantur a ni tur ah ngai ila, tawngpawng hungping deuh pawp lam chu hmundanga ramri hung tawh en hi chuan a nih a rinawm chiahloh.

Tun dinhmun ah luitui  kai nuamlai deuh leh khan remchang apiangah an duh hun hunah eng eng emaw paipawn chunga an rawn lut ngawt zel hi chu, tuna kan dinhmun ah chuan kan chhiatpui tih a chiang a, ramri hi hung a nihloh chuan ramri tluanin Sipai leh Tlawmngai pawl tan duty dah khah vek theih a ni silo.

Ramri hung a nihloh vanga ruihhlo hmanga min runnate, kan nunna hial min laksak thin te hi a rehphah hlauh dawn phei chuan hung ngei se tih hi tun dinhmun a mitamtak ngaihdan a nih a rinawm.