Electoral Roll siammek chungchangah Central YMA hruaitute Meeting neihpui.

Electoral Roll siamtharna, Special Intensive Revision neih mek chungchangah vawiin khan Lawngtlai Bawrhsap Pu Donny Lalruatsanga kaihhruaina hnuaia, Electoral Roll chungchanga Lawngtlai tlawhtu Central YMA hruaitute meeting neihpui a ni.

Bawrhsap Pu Donny Lalruatsanga chuan Electoral Roll dik leh felfai neiturin theihtawp an chhuah tih sawiin, Lawngtlai  District chu ramdang Myanmar leh Bangladesh nen ramri thuitak intawm niin, raltlan engemawzat an awm bawk bakah, Myanmar ram buaina vangin ramriah sumdawnna a kal reng bawka, fimkhur a ngai hle a, hemi kawngah theihtawpa fimkhur turin thawktute pawh an inchah nasa tih a sawi.

He Meeting telpuitu Adviser to CM, Dr.Lorrain Lalpekliana Chinzah chuan Electoral Roll felfai neih a nihtheih nan a theihtawp chhuahtute fakin, Central YMA leh Central YLA in helam hawia hma an lakna chu thlamuanthlak a tih thu a sawi.

Central YMA Asst.Secretary Pu SF David Ngursangzuala chuan tuna Electoral Roll siammek chu Mizoram hmalam hun thuitak nghawng thei a nih vangin ,chuang theilo tur an chuan Central YMA chuan a hlau hle tih sawiin, Electoral Roll buaipuitute chu diktaka hna thawk turin a chah a, helam hawia Central YLA hmalakna chu Central YMA in a thlawp tlat tih a sawi bawk.

Central YLA President Pu F.Lalrothanga chuan Hearing neih mekah ,dan kalha Electoral Roll a luh tumte awmtheihna khua  te Central YLA chuan a thutchilh vek tih sawiin, Branch YLA te pawh theihtawp chhuah turin an hriattir thuna sawi.

Electoral Roll chungchang thutkhawm ah hian Election Officer Pu Collin Hlycho chuan Electoral Roll buaipui mek chungchang a sawifiah a, sawiho ngai leh hriatfiahloh awmte inhrilhfiahna hun hman a ni.