December ni 29-a Lawngtlai district Tuisentlang a rawn lut Myanmar sipai 151 zinga 147-te chu nimin khan Parva atangin Lunglei luhpui an ni a, vawiin hian Aizawl thlenpui an ni.
Myanmar sipai 4-te erawh chu an hliam nat deuh avangin Lawngtlai district-a Zorinpui -ah enkawl mek an ni a. Anni hi Assam Rifles doctor-te’n an enkawl ni a thudawn a ni.
Myanmar sipai 147 an rawn phei puite hi officer chin chu Khatla-a 23 sector hmunah awmin a dang chu Lammual bula Assam Rifles battalion hmunpui emaw an insawnna tur Zokhawsang a in an la luah kim lohvah te emaw an dah a rinawm niin Home department hotute chuan an sawi a. Myanmar lama hruai dan turah Indian Air Force helicopter nge hman a nih dawn a, lirthei a Manipur lam panpui an nih dawn tih hriat a la ni lo.
Myanmar sipaite hi an awmna hmun, Parva epa Myeik Wa Camp an tih mai chu December ni 29 a Arakan Army hel pawlte'n an luh chhuah a an laksak avangin Tuisentlang khua-ah an rawn lut a. A tirah mi 83 rawn lut phawtin zan lamah mi 68 an rawn lut leh a, an vai hian mi 151 an ni. An zingah hian hliam 9 an awm a, chu'ng zingah chuan hliam na zual 4 an awm a ni. Ralthuam an rawn luhpui hnem hle a, an lo luh hnu-ah Police-te chuan lo dawngsawngin Assam Rifles an hriattir a. Assam Rifles te hian Parva lamah lirthei hmangin an hruai a.
An ralthuam rawn luhpuite chu - Rifle 93, pistol 17, Rocket Propelled Grenade (RPG) 4, Mortar 4, Medium Machine Gun (MMG) 2, Light Machine Gun (LMG) 5, Sniper rifle 4 leh hand grenade 374 te a ni.