Vawiin khan Lawngtlai Press Club ah MJA Lawngtlai District leh District Election Office, Lawngtlai tangkawp buatsaihin Political Party hrang hranga IT & Media Cell te pualin Media Awareness Campaign neih a ni.
Pu Lalchharliana Lawngtlai District MJA General Secretary kaihhruai ah he hun hmanpuitu Election Officer Pu Denny Lalchhuanawma chuan Assembly inthlapui kan hmachhawn dawn a, election felfai leh dik a awmtheih nan Political Party te pawimawhna a lianin, a hnuk pawimawh ber a nih vangin inthlanna boruak fel leh felloh ah Political Party sukthlek a pawimawh a, boruak tha siamtura hmalakna nasa zawk kalpui zelturin a ngen a, Election Commission of India in kaihhruaina hrang hrang a siam a, hengte hi thataka kan zawm chuan inthlanna a felfai ngei ngei ang a ti a, Political Party leh mipui lam pawn inthlan kaihhnawih ah hriatduh an neihte hrilhfiah turin Election office chu a inhawng reng a ni a ti.
He hun ah hian Lawngtlai District MJA President Pu Lalngheta Ralte chuan Political Party a Media lama mawhphurhna neite sukthlek, an thu thehdarh duh leh tawngkauchheh thlengin mipui kaihruaitu ber an nih vangin fimkhur leh puitling zawka kaltura ngenin, Political Party te Media an hman tangkaia an hmanthiam leh thiamloh ah ram sukthlek a kalfuhin a kalfuhlo thei a, Political Party hrang hranga Media te leh Journalist ten thawhhona thatak an nei chu MJA President chuan lawmawm a tih thu a sawi bawk.
Media Awareness Campaign ah hian BJP, INC, MNF leh ZPM a IT & Media aiawh te telin, chawhnu lam, District MJA Vice President Pu Elvis Lalthangzuala kaihhruai ah inkawmhona hlawk tak hmangin, Political Party aiawhten an ngaihpawimawh zawngte an sawi a, District MJA Treasurer Pu H.Lalrinmawia'n lawmthu sawiin Awareness campaign hi tihtawp a ni.
