Saipum-ah hian chhungkaw 60 (member 172) vel leh Saiphai-ah chhungkaw 15 (member 48) an awm mek a. Saipum-ah hian buhfai bag-16, Rs 5,000/- leh damdawi chi hrang hrang sing thum man hu pek an ni a. Saiphai-ah hian buhfai bag 8 leh Rs. 5,000/- pek niin, N. Chawnpui a raltlante tan buhfai bag 1 leh Rs. 1,000/- pek an ni bawk.
Tanpuina hlanna-ah hian MZP General Headquarters, Aizawl President Pu Lalnunmawia Pautu chuan, Manipur a kan unau Zofate tawrhna chu pawi a tih thu leh MZP chuan engtik lai maha Zofa hmun hrang hrang a awm harsatna tawkte a ensan ngai dawn loh thu a sawi a. An tan MZP a awm reng thu leh a theih ang anga unaute tanpui tura a inpeih reng thu a sawi bawk.
Pu Lalnunmawia Pautu chuan, "Sem sem dam dam ti thin hnam kan nih avangin, in unauten kan ei chhung chu in nghei lovang" tiin thlamuang tak a awm turin a chah a. An tan mipui leh sawrkar-in theihtawp a chhuahna te hriatpui a, an mahni enkawltu khawtlang hruaitute nen a tha tak a thawkho zel tur leh khawtlang tan a harsatna siam lo turin a chah bawk a ni.
MZP General Headquarters, Aizawl hruaitute hi MZP Headquarters Kolasib hruaitute leh Govt. Kolasib College Student's Union Leader ten an tawiawm a ni.