Mizoram sawrkarin Lawngtlai District-a accredited journalist-a a thlante Press Accreditation Card hlanna hun leh District MJA member-te tana "journalists' workshop" chu vawiin khan Lawngtlai Press Club-ah District Information & Public Relations Office leh Mizoram Journalists' Association , Lawngtlai District ṭang kawpin an buatsaih.
Press Accreditation Card hi Lawngtlai Bawrhsap, District MJA Patron Pu David Lalthantluanga chuan Lawngtlai District-a accredited journalist mi pasarih hnenah a hlan a. Sawrkarin accredited journalist nihna a pekte chu lawmpuina leh duhsakna hlanin, an hna thawhna leh an khawsaziaah accredited journalist nihna vawng nung a, chawi sangtu nih tum turin a chah a. District Administration-in Lawngtlai District MJA te thawhpuina ṭha tak an dawng ṭhin chu lawmawm a tih thu sawiin, District hmasawn nan thawh hopui zel turin a sawm a. Social media-ah thuthang dik lo leng vel a tam ṭhin avangin thu dik zawk puanzarna leh mipui zirtirna kawngah accredited journalist leh MJA member-te chuan mawhphurhna an nei sang zual tih sawiin, khawvel ṭhang zel ruala District mipuite'n hma an sawn ve theih nan chanchinbu mite'n an chanchinbu leh media kal tlanga mipui zirtirna an puanzar tam a pawimawh thu a sawi bawk.
He hun hi District MJA Vice President Pu Elvis Lalthangzuala chuan kaihruaiin, District MJA President Pu Lalngheta Ralte chuan Lawngtlai District ah Accredited Journalist pasarih lai mai an awm thei chu lawmawm a tih thu sawiin, Accredited Journalist te pawn Sorkar mihriat an nihna chu ram tan tangkaitaka an hman tul a tih thu a sawi a, Sorkar pawhin Accredited Journalist te chu tun aia nasa zawkin hmangtangkai se a duh thu a sawi.
Press Accreditation Card sem zawh hian journalists' workshop buatsaih zui nghal a ni a. DIPRO Pu C. Lalhruaitluanga chu resource person niin, "journalism leh tunlai khawvel" tih thupui hmangin journalist-te dinhmun leh hma sawnna tur leh ṭan lakna tur hrang hrangte ngaihtuah ho leh sawi hovin hlawk taka hun hman a ni.