Lei dawh nana hmanraw mamawhte chu BRO hnuaia Project dang atanga lak niin, thui tak phurh ngai a ni chungin hna tikhawtlai lo turin hlawm lian leh hmanhmawh takin lei dawhna hmunah hian thiar luh a ni a, BRO 71 RCC hnuaia thawktute chuan khaw cheng, khaw lum karah bungrua leh hmanraw rit tak tak buaipuiin, he lei dawhnaah hian hah leh rim takin an thawk tih 71 RCC hotute chuan an sawi.
Lei hi dawh zawh a nih hnuah uluk takin a him leh him loh enfiah leh vek a ni a, him tawka ngaih a nih hnuah July ni 3, 2023 khan lirthei zawh theih tura hawn niin, he lei hi Mizoram chhim lam mipuite leh ramri hrula sipai duty-te tan inkal pawhna tha tak siamtu a nih bakah, Vaseikai atanga Parva thlenga mipui chengte tan khawsakna mamawh hrang hrang thiar velna kawngah a pawimawhin, a tangkai hle a ni.
He lei hman theih a nih hnu hian Parva chhehvela hmasawnna hna thawh hrang hrang pawh a pangngaiin kalpui theih a nih leh phah a, Chief Engineer, Project Pushpak kaihhruaina leh a thawhpuite theih tawp chhuahna zarah he lei dawh hna hi hun rei lo te chhungin, tluang takin thawh zawh a ni a ni.