Pu K. Vanlalvena hian Union Home Minister Amit Shah leh Union Home Secretary Ajay Kumar Bhalla hnenah lehkha thawnin tun hnai a Kuki-Chin hel pawl leh Bangladesh sipai inkahna avanga Chittagong Hill Tracts a cheng mi tam tak an khua chhuahsan a an awm thu a sawi a. Ţhenkhat chu Mizoram chhungah rawn raltlanin Mizoram sorkar leh an raltlanna hmun a mite’n theihtawpin an lo tuam hlawm a ni, a ti a. Chutiang a nih lai a, nunau, hnute hne lai thlenga rawn luh tumte BSF mite’n luh an lo phal lo chu a nunrawnthlak a tih thu a sawi a. A tlai hma ngei a inrawlh thuai a, BSF-te hi raltlante Mizorama an luh phaltir turin a ngen a ni.
Pu K. Vanlalvena chuan tunah hian Mizorama rawn luh tum nunau engemawzat chu BSF-te an hlauh avanga rawn lut ngam lovin Bangladesh ngaw hnuaiah an awm mek niin a sawi a.
Hetiang a nih chhan hi Ministry of Home Affairs-in luhtir phal tura thu a pek loh vang ni a a lan thu a sawi a. Kum 1970 chho vela Kaptai tuikhuah a nih avanga Chakma tam tak Mizoram leh Arunachal Pradesh a raltlan lo luh phal a nih lai leh, anni phei chu Mizote nena hnam leh chi khat pawh an ni lo chunga sorkar laipuiin a awm hlentir lai a, Mizo hnahthlakte ngei raltlan lo luh phal loh a ni chu inthliar hranna tenawm taka a ngaih thu MP chuan a tarlang a ni.
Hetianga luh phal leh phal loh neih hi chi inthliarna a nih avangin Mizo ni bawk, Mizorama rawn raltlan duh zawng zawngte luh phaltir turin MP hian sorkar laipui a ngen a ni.