Bangladesh buaina vanga an sahimna zawnga Lawngtlai District a luhtum zing a mi Pastor Chhawnkhupa Kum 80 upa chu nizan dar 8:20 khan ramhnuai ah a thi a, ruang laturin mitlawmngai te an kalmek a, Police leh BSF pawh ruang latur zingah hian an tel.
The Lawngtlai Post in Parva-III khawtlang hruaitute hnen atanga thu a dawn danin, Pastor Chhawnkhupa thihna hmun hi ramhnuai pilril tak, Mizoram a khawhnai ber Simeinasora atangin ke in darkar sarih kal ngai a ni a, ruang laturte hian vawiin chawmhma dar 11:30 khan Simeinasora an chhuahsan a, Parva-III a ruang rawn thlenpui theih hun tur hi sawilawk hleihtheih nilomahse, zanin zanlai pelh ah chuan Parva-III thlenpui hman beisei a ni.
Pastor Chhawnkhupa ruang lakdantur leh a thihna chungchang ah Lawngtlai DC chuan thil tulpawimawhte bawhzui zung zungin, ruang hi Khawmawi, Lunglei District a an chhungten an la dawn a, Khawmawi ah hian vuiliam tura ruahman a ni.
Pastor Chhawnkhupa hi Evangelical Baptist Church Pastor ni a hriat a ni a, amah hi kum 80 lai ni tawh, taksa lama harsatna hrang hrangin a tlakbuak niin, a thih chhan hi Lawngtlai SP Pu C.Lalruatkima chuan tun dinhmun ah hriatchian theih a la nihloh thu leh thilawmdan an enzui reng thu The Lawngtlai Post a hrilh.
Tags
News