LADC Office khar, CEM in MJA te thingpui a inpui.

    Lai Autonomous District Council Office chu kumin atan naktuk atangin khar a ni dawn a, kumthar January 10 ah LADC Office hi hawn leh a ni ang.

    Kumin atana Office an kaini hnuhnungber ah LADC hnuaia Department hrang hrang te chuan Pathian hnen ah inhlanna neiin, Krismas leh kumthar hlim taka hmang turin duhsakna an inhlan a, chawhma lam khan Office hna pawimawh kumin atana tihfel ngai chite tihfel nan thawktuten hun an hmang bawk.

    LADC a Chief Executive Member Pu V.Zirsanga chuan mipuite Krismas leh kumthar hlimtaka hmangturin duhsakna a hlan a, CEM hian Lawngtlai District MJA te thingpui inpuiin, Lawngtlai Journalist ten mahni hlawkna ringawt umlova, ram leh hnam tana theihtawp an chhuah thin chu chhuanawm a tih thu sawiin, atul angin Sorkar finchhuah kawngah pawh tan la sauh sauh turin a chah.

    MJA Lawngtlai District hruaitute chuan District Council leh MJA inkarah thawhhona thatak an nei te, LADC Sorkarin Chanchinbumite dinhmun hrechianga duhsakna awmthei ang ang a ngaihtuah thinte chu Lawngtlai Chanchinbumiten an tangkaipui hle tih an sawi a, LADC a thawktute chu District MJA ten hlimtaka hunpui hmang turin duhsakna an hlan.