Dt. 14th October, 2022 Zirtawpni, Rulkual khuaa Electric Line chhia siamtha tura hnatlang te atanga vanduaina tawk ta kan YLA Members duhawm tak tak mi pathum (3) Samuel Lalthianghlima (26) S/o C. Lalthawmmawia, Zoramdinpuia (23) S/o C. Lalhmunmawia leh C. Lalrinchhana (18) S/o Singthuama te chunga thihna hial lo thleng ta hi Central YLA chuan pawi a tiin mitthi chhungte kan tuarpui takzet a ni. Tin, hliam tuar mi pahnih (2) Lalnghawrliana leh Lalrinenga te pawh dam taka damdawi in an chhuahsan ngei theih nan duhsakna sang ber kan hlan a, he chhiat tawhna avanga lusun mekte leh hliam tuarte kan tuarpuiin, Pathian thlamuanna leh awmpuina an chan zel kan duhsak takzet a ni.
Hun engemawchen atang tawh khan keini chhim lam leh Lawngtlai District bik hi Electric Power chungchangah harsatna kan tawk fo tawh a, Electric Power hrui chat siam tha turin YLA te pawh vawi engemawzat kan lo hnatlang fo tawh thin a ni. Electric Department te inthlahdah avangin accident vawi tam tak a thleng tawh a, a thawktute bakah Civil mi ten hliampui tuarin, nunna hlu tak pawh an lo chan tawh bawk a ni. Chuvangin, Central YLA chuan he chhiat tawhna chungchangah hian sawrkarin Inquiry Commission din sela, he thil thleng chungchangah hian a hma thei ang berin he lai Power Supply Upgradation hnathawk lai atanga, a History te chhuichiangin, he thihna runthlak tak mai lo thleng hi sawrkarin chhui chiangin, Engineering Failure a awmna chhan leh concerned Department atangin mawhphurhtu te hi chhuichhuak sela, an phu tawk hremna an hmuh theih nan hma la ngei rawh se tih hi Central YLA chuan sawrkar kan phut tlat a ni. Tin, he vanduaina avanga nunna chan ta kan Member pathum (3) te leh hliam tuar mek mi pahnih (2) hi sawrkarin zangnadawmna pe ngei turin Central YLA chuan kan phut a, kan beisei tlat bawk a ni.
Electric Power chhiat avanga YLA leh khawtlang hnatlangin Department a puih bawm changin mipuite himna ngai pawimawh hmasa ber turin Department te kan phut a, hetianga hmalakna mumal lova hnatlang thawk tur hian Department-in khawtlang pun tawh suh se. He chhiattawhna ang leh Electric Power avanga thihna hial hi thleng nawn tawh lo se tih hi Central YLA chuan a duh a, sawrkar pawhin a tih tur dik tak ti a hmala zui zel turin kan ngen a kan beisei tlat bawk a ni.
Issued by Central Young Lai Association, Lawngtlai