Lawngtlai Auto Rickshaw Owner Association chuan, kum 5 chhung chu Permit thar pechhuak loturin Sorkar an ngenlaiin, a petheitu lamten an pekchhuah takah chuan, hnukkir turin Sorkar an nawrna chu a kalmek a, hemi chungchang hian Social Media leh khawlai titi pawh a luah viauin a hriat.
Midangte dinhmun kan sawi dawn hian, an dinhmunah indintir chhin hi mifing zia a ni a, an thawmhnaw han hakchhin te te a, titikhawchang han sawite hian a pai a nuam duh deuh thin.
Association lam chuan an dodalna chhan chiangtakin an puangzara, Sorkar lam hian, Permit pekchhuah anih chhan hi an puangzar lemlova, Sorkar chu mipui rawngbawlsaktu a ni a, hetianga Sorkar kaldan dodal a nih chuan, Sorkar hian LAROA te tan chauh nilo, ram mipuiten Sorkar kaldan an hriattheih nan chiang deuh taka a sawifiah ve hi a tihtur diktak niin a hriat.
Eizawnna chu a taima, fel leh hmangchang hriate dinchhuahna a ni a, diktak chuan, Permit hi tun ami aia tam pawh hi pechhuakse, thahnemngai taka thawkte chuan an tlakchhiatphahlo maithei, tundinhmunah chuan, Auto Rickshaw enkawltute hian mipui an mamawhna aiin, mipuiin an mamawhna hi a la lian zawk em aw, a tihtheih.
A pawimawhber ah chuan, mipuiin an mamawh em? Eizawnnan a hmangmekte a nghawng buai thei dawn em? tihte kawng hrang hranga thlir chungin Sorkar chuan Permit hi a pechhuak tura ngaih a ni a, hetiang zawnga thlir lova, pektheih a ni alawm tih vanga pekchhuah a nih chuan, kan intamchhuah mai ang tihte pawh a hlauhthawnawmna chin chu a awm ve tho in a hriat a, Sorkar hian Auto Rickshaw Permit thar a pekchhuah chhan hi mumaltakin han puangzar ve phawt sela, chutatang chuan mipui lam tan pawn ngaihdan mumaltak a neihtheihin a rinawm.