Myanmar Sipai leh A.A inkah vangin Raltlan 200 chuang an awm tawh.

    Lawngtlai District chhimthlang lam dep, Myanmar ramchhungah Myanmar Sipai leh Arakan Army te inkahna vangin Lawngtlai District chhung ah an sahimna zawnga tlanlut mi 209 an tling tawh.

    Inkahna thlenna hmun hi Laitlang atanga hla vaklo, Myanmar ram chhunga Varang leh a chhehvel a thleng niin, raltlan te hian Mizoram chhunga khaw hnai ber Laitlang an pan bak ah, hetang hian henglai chhehvel a khawdang Hmawngbuchhuah, Dumzautlang,   leh Zochachhuah  te an pan bawk. Raltlante hi an chhungte leh hmelhriatte bel engemawzat an awmlaiin Hall leh inruak danga awm an awm nual bawk.

     Raltlante hi Lawngtlai District thuneitute chuan a theih ang angin an vil reng a, inkahna hi a thlen deuh reng vangin raltlan hi la phun belh thei niin tualchhungmite chuan an sawi.

    
     Kum 2017 kumtawp lam khan Lawngtlai District leh Myanmar inrinna, Myanmar ramchhung, tuna inkahna thlenna lai bawr vel ah hian Myanmar Sipai leh Arakan Army te hi an lo inkap tawh a, heimi tum hian raltlan engmawzat Lawngtlai District ah tlanlutin, boruak a muanawm hnu kum 2019 July 2 khan raltlan chambang 219 chu Union  Home Ministry ruahmanna in Myanmar ram ah dahlet an lo ni tawh a ni.