MJA Vice President hovin National Eye Donation Forthnight kharna hmang.

     National Eye Donation Forthnight vawi 37 na kharna chu vawiin chawhnu dar 2 khan Eye Care Hospital, Dawrpuiah Eye Care Hospital bul tumin hman a ni a. He hunah hian MJA Vice President Pu Lalremsiama chu khuallian a ni. Thupui atan "Nang erawh chuan i hmu thei, " tih ngaihthlak a ni.

Pic: Aitea

    Thusawiin MJA Vice President Lalremsiama chuan, Eye Care Hospital in mittha lo te tana ruahmanna fel tak an nei chu lawmawm a tih thu a sawi a. Mit that loh avanga damlo ten phailama pana, sum tam zawk sen ngai lova Mizorama hospital an ruahman thei chu a lawmawm a ti a. Eye donation lama hmalakna tur hrang hrang leh mipui lama hrilh hriatna turah MJA ten tih tur kan nei a nih chuan kan theih tawk kan lo chhuah ang, a ti bawk.

    Mizorama mit doctor te thiam tak takte an awm reng thei dawn lo. Hnamdang doctor te an rawn awm a rem lo, chumi a awm loh nan chuan RIPANS zirlaiten thahnemngai taka zira, Mizoram tan chhenfakawm taka zir chhuak turin a chah a ni.

    He hunah hian mit darthlalang pawimawhna leh hna a thawhdan hrang hrang ngaihthlak a ni a. Eye Bank in eye donation an buaipui dan hrang hrang tarlan a ni bawk. Mizoram Eye bank chu kum 2008 ah Eye Bank Association of India inziah luh a ni a. 25 Sept. 2009 ah Mizoram a hmasa ber atan mit darthlalang thlak a ni.

    Mi inphalten Mit tha lo te tan mit an pek dawn chuan an dam laiin an phalna lak angaia, chutianga intiamnna an nei lo a nih pawhin an thih hnuah pawh an chhungte hnenah dil theih a nih thu tarlan a ni a. Mitthi tawh chu a Mit mu la chhuak lovin Mit darthlalang chauh lak a ni thin a. Chhungte tan pawh hmuh hreawm a ni lo bawk a ni. Damlo chu a thih atanga darkar 6-8 hma ngeia mit darthlalang hi lak thin tur a ni bawk a. Mit pek hi mit tha lo tu pawn an dawng thei a ni.

    Kum 2008 atanga 2022 thlengin mit darthlalang lak 938 an awm tawh a. Mit pe tura intiam 8620 awmin, mit thlak ngai damlo in hriattir 362 an awm a. Mit pe tur a intiam mi 474 an thi tawh bawk a ni. Mihring mit thlak nan hian mihring mit bakin a thlak theih loh a ni.

    
He hunah hian RIPANS Bsc 3rd Year Optometry, Mizoram Optometrist Association, Mizoram Ophthalmic Association, bakah Staff of NPCBVI, Mizoram bakah chanchinbu mite an tel a ni.