Mizoram Khawpui Fai Intihsiakna 2022 leh Swachh Survekshan 2023 puala Lawngtlai khawpuia faina beihpui thlak tur chu Inrinni zingkar khan Areopagy ah a khuhhawnna hun hman a ni a, LADC-a Sanitation changtu Executive Member Pu Lalropuia Chinzah chu Khuallian a ni.
Khuallian Pu Lalropuia Chinzah chuan Lawngtlai mipuite’n faina kawnga mahni zawna hma an lakna chu a lawmawm viau rualin, hmasawnna tur tam tak a la awm avangin inthlahdah lova tan lak chhunzawm zel a tul a ni, a ti a. LADC, District Administration leh UD&PA Department te tang tlangin Lawngtlai khawpui tana bawlhhlawh paihna leh thliar hranna tur tha tak a ruahman mek thu a sawi a. Fainain mimal leh khawtlang hmasawnna leh hriselna a keng tel tih sawiin, khawpui fai intihsiakna chu khua leh tui zawng zawng huap a ni tih hriaa mi dangte leh khawpui dangte tana entawn tlak khawpa inpho chhuah tum turin Lawngtlai mipuite chu a sawm a. Mizoram Khawpui Fai Intihsiaknaa inbuatsaih nana hman atan pawisa fai eng emaw zat chu LADC Sanitation Department ai awhin Sub-Committee kutah a hlan nghal a ni.
He hun hi Mizoram Cleanliness Competition 2022 Sub-Committee Chairman, Additional DC Pu James Miahlung chuan a kaihruai a. MCC 2022 Sub-Committee Member Secretary, UD&PA-a District Project Officer Pi TT Beikhaizi chuan khawpui fai intihsiakna kalpui dan tur leh intihsiaknaa tehfung hrang hrang leh hun bi tuk te a sawi fiah .