Hmundang rualin Lawngtlai ah pawh nimin khan Remna Ni pualin , DC Conference Hall-ah Assembly Speaker Pu Lalrinliana Sailo hovin hun hman a ni.
Speaker, Pu Lalrinliana Sailo chuan, Remna leh muanna a awmtheih nana sulsutute zahna chibai a buk a, rambuai hunthim hrehawmtakin Mizoram a tuam a, remna a awmtheih nan theihtawpchhuahin hmalakna kalpui a ni a, Hnam Sipaite kha an zamlova, an tlawm heklova, mipuiin rambuai chu kan tuar nasain, kan tlin silova, remna kawng zawh a ngai ta a, Remna kan neih chu ka vaia thawhrah a ni a ti a, khatihlai a Chief Minister Pu Lal Thanhawla'n Chief Minister a nihna a kianlo ti a sawi awm thinte chu thalo a tih thu Speaker chuan sawiin, Chief Minister dinhmun chu kian a ni a ti.
Speaker chuan Remna chuan rahtha a chhuah chhozel a, Remna leh muanna awmna State, ralmuang bawksi ah hian engtinnge hmasawnna nasa zawk kan neihtheih ang tih hi ngaihtuah a ngai a, a bikin Lawngtlai District tan Kaladan Multi Modal Trasit Transport Project chu ram dinhmun dawmkanna tur pawimawh tak a ni tiin, Speaker chuan he Project, a nihtur anga peihfel a ni thei mailo chu pawi a tih thu sawiin, hmasawnna rawn luangluttur a khawtlai phah a ni ati.
LADC a, CEM, Pu V.Zirsanga pawhin thusawiin, Mizoram in Remna a neih chu a chhuanawm takzet tihsawiin, Peace Accord chuan a hnulamah boruak duhawmlo, phuba lakna lam hawi te hrinchhuah a nei miahlo chuan Lalpa hriatpui Remna a ni tih a tilang chiang hle a ni a ti.
Lawngtlai a Remna Ni hmanna ah hian DC, Pu Amol Srivastava chuan inlawmna thu sawiin, Lawngtlai Area BCM, Executive Secretary Rev.Dr.H.Lalthlamuana'n hunserh a hmang a, District Information & Public Relation Office, Lawngtlai in Remna Ni puala, Video an siam chu thlirho a ni a, Pu James Miahlung Additional DC chuan lawmthu sawiin hun a khar a ni.
Lawngtlai a Remna Ni hmanna ah hian LADC leh State Sorkar a mipawimawhte, Tlawmngaipawl hruaitute Political Party aiawh leh Chanchinbumite an tel.