NABARD sum hmanga sak, Bilkhawthlir Primary Health Centre chu nimin khan Health Minister Dr. R. Lalthangliana’n a hawng.
Minister chuan Primary Health Centre, Bilkhawthlir hawn theiha buatsaih a ni chu lawmawm a tih thu sawiin PHC sak puitlin nana thawktu inpe zo tak tak an awm chu an fakawm, a ti a. Serlui biala Health Sub-Centre awm zawng zawngte chu Health & Wellness Centre-ah hlan kai vek tawh a nih thu sawiin, Vairengte Community Health Centre pawh tih changtlun chhoh zel tum a ni, a ti.
Pu Lalrinsanga Ralte, MLA, Vice Chairman, Rubber & Allied Crop Development Board pawhin thu sawiin Serlui Bial chhunga Health Clinic hawn tharah te mipui hriselna endik hna chak zawk a kalpui a nih theih nan MLA fund hmangin mi 7 chhawr mek an ni, a ti.
Bilkhawthlir Primary Health Centre chu NABARD RIDF XXV hnuaia sum, Cheng Vbch 2, Nuai 25 Sing 5 Sang 8 hmanga sak a ni a, ni 9, September, 2020 khan sa tanin ni 23, November, 2021 khan sak zawh a ni .